Edukasaun Kualidade, Retornu Garantidu

0
59
Ilustasaun husi Rafy Belo

DILI (TATOLI)-Investe iha edukasaun ho kualidade, retornu garantidu. Deklarasaun badak ne´e hato´o husi reitór Dili Institute of Tecnology (DIT), Manuel Florêncio de Canossa Vong, bainhira entrevista ho ajénsia Tatoli, iha Kampus DIT, Ai meti laran, Manleuana-Dili, ohin.

Bainhira ita hakarak investe, iha retornu fila satan investe iha edukasaun. Edukasaun ida ne´ebé la´ós naran-naran maibé ho kualidade.

“Edukasaun ne´ebé kualidade mai husi investimentu ne´ebé ligadu ho komponente mínimu iha lima,” akresenta reitór institutu akadémiku privadu ne´e.

Nia esplika komponente sira ne´e mak tenke investe iha ema hanesan dosente atu bele hetan matenek ne´ebé kualidade.

Segundu, ita buka atu investe iha infraestrutura ne´ebé ho kualidade katak tenke iha sala-de-aula, fasilidade aprendizajen, iha ambiente aprendizajen no biblioteka ne´ebé mak di´ak.

Terseiru, tenke iha kurikúlu ida ne´ebé mak di´ak signifika kurríkulu ne´ebé liga entre teoria nó moos faktu eh realidade ou rekursu naturál nó mós sosiál ne´ebé mak ita iha. Se lae ita aprende teoria, atu uza ita susar.

Kurríkulu ne´ebé di´ak, fó solusaun, fó moris di´ak ba nia estudante no formandu sira.

Kuartu, edukasaun ne´ebé di´ak mai husi polítika ida ne´ebé mak di´ak katak polítika ne´ebé hamahan ema tomak atu bele hetan buat ne´ebé nia interese, nia mehi sai realidade. Polítika ne´e tantu iha instituisaun akadémika ida no instituisaun governu nian.

Ikus liu mak jestaun ida ne´ebé mak ho kualidade tanba ita iha polítika bainhira la iha jestaun, ita labele hetan rezultadu ida ne´ebé ho kualidade.

Tanba ne´e, jestaun ida ne´ebé ho kualidade signifika kualidade iha planu ne´ebé mak asegura ita-nia prosesu aprendizajen ida di´ak, planu ida di´ak iha implementasaun no monitorizasaun, planu ida di´ak iha ninia organizasaun nó mós planu ida di´ak iha nia avaliasaun.

Portantu, jestaun ida di´ak, refere ba planu ida kualidade, implementasaun no monitorizasaun  ho kualidade, organizasaun ne´ebé kualidade no avaliasaun di´ak.

Nia reforsa, ita investe iha edukasaun ho kualidade retornu garantidu tanba kompara ita halo uma ida, rai nakdoko nia bele naksobu, investe karik osan iha fetosaa-umane loron ida kuda eh karau bele mohu tiha to´o ikus mai ita sei la lori buat ida.

Ita investe karik iha edukasaun ho kualidade nia retornu garantidu tanba husi matenek ida, ita bele halo barak.

“Tan ne´e ha´u dehan katak investe edukasaun ho kualidade asegura aspetu sira liuliu labele sakrifika estudante sira-nia interese satan ita haluha nia kualidade” konklui reitór DIT, Manuel Vong.

(Jornalista: Rafy Belo)

(Editór : Manuel Pinto)

HUSIK IDA HATÁN