Dezenvolvimentu Sosiedade Rurál Presiza Kontribuisaun Inan Feton Sira

0
186
Espoza Prezidente Repúblika Demokrátika Timor-Leste (RDTL), Cidalia Lopes Nobre Mouzinho Guterres. Foto mídia PR

LIKISA, (TATOLI) – Espoza Prezidente Repúblika Demokrátika Timor-Leste (RDTL), Cidalia Lopes Nobre Mouzinho Guterres, hateten valór sosiál nu’udar baze ba dezenvolvimentu ekonomia sosiedade, nune’e inan feton sira presiza partisipa no kontribui ba dezenvolvimentu sosiedade rurál.
“Ita hatene katak iha pasadu maioria komunidade sira uza de’it produtu doméstika, maibé ikus mai hahú iha valór komersiál eh merkadu, nune’e presiza tebes inan feton sira hodi kontribui ba dezenvolvimentu feto rurál”, haktuir Cidalia iha abertura selebrasaun loron internasionál ba feto rurál iha suku Watu-Vou, Postu Administrativu Maubara, Munisípiu Likisa, kinta (26/10).

Tuir nia, dala-barak feto sira hasoru difikuldade hodi hadi’a liutan produsaun no asesu merkadu nomós obstákulu ne’ebé feto frekuenta mak menus asesu ba rai hodi bele jere, menus asesu kréditu tanba rekezitu aas no todan, oportunidade asesu informasaun menus no asesu merkadu ne’ebé kompetetivu.

“Ha’u haree kondisaun infraestrutura báziku hanesan estrada, bee moos nu’udar obstákulu ida hodi dudu partisipasaun no kontribuisaun feto sira nian iha área rurál ne’ebé rai buras”, rekoñese.

Nia dehan tan, realidade moris sosiedade rekoñesidu katak feto sira nu’udar forsa traballu iha área agrikultura, komersiu no servisu informál seluk tan.

Nia haktuir, antigamente no to’o agora produsaun feto sira nian hanesan homan no soru uza de’it ba atividade sosiál hanesan lia mate no moris. Feton sira mós produtivu iha área agrikultura ba produsaun hare, modo, aifuan no hakiak animal hodi sustenta ba nesesidade família.

Nia hatutan, produsaun agrikultura maka’as no iha oportunidade merkadu no valór komersiu adekuada, enkuantu infraestrutura báziku sei fraku no sei difikulta rendimentu no dezenvolvimentu ekonomia sosiedade nian.

Iha parte seluk, kada tinan eskola sekúndaria no universitáriu halo graduasaun nafatin maibé kampu servisu la sufisiénte hodi akomoda graduadu sira. “Tanba ne’e ha’u motiva ba sosiedade hotu atu halo intervensaun adekuada no integra ba situasaun joven sira nian”.

“Ha’u fiar metin katak governu liuhosi Sekretariu Estadu Juventude no Traballu, liña ministériu sira relevante sei toma atensaun”, afirma nia.

Jornalista: Zezito Silva

Editora: Rita Almeida

HUSIK IDA HATÁN