AUF Disemina Informasaun Anti Droga ba Komunidade

0
53
Angeles University Foundation (AUF). Foto espesiál.

DILI, (TATOLI) – Bolseiru timoroan, Mario Soares ne’ebé estuda iha Angeles University Foundation (AUF), Fakuldade Kriminolojia hamutuk ho universitáriu sira AUF nian disemina informasaun kona-ba anti droga ba komunidade Telabastagan, San Fernando no estudante San Jose Integrated School (SJIS), City of San Fernando iha Manila-Pampanga, Filipina durante loron ida tomak.

Droga nu’udar medikamentu ne’ebé mai husi plantasaun no naun-plantasaun, tantu sintétiku nomós naun-sintétiku ne’ebé kauza dekresimentu ka mudansa konsiénsia no seluk tan ba saúde tanba ne’e droga la di’ak.

Bolseiru, Mario Soares.

Mario Soares ba Tatoli husi Filipina, tersa (17/10) informa, diseminasaun ne’ebé sira hala’o liuhusi semináriu ne’e iha objétivu  lima.

Ida, atu eduka inan no aman no estudante sira kona-ba impaktu droga iha komunidade nia leet, rua mak fahe informasaun kona-ba droga globál ne’ebé abuzu husi nasaun oin-oin.

Tolu, atividade ida ne’e parte ida husi AUF hodi serbi komunidade, haat mak ho semináriu halo estudante sira sai ema ne’ebé iha responsabilidade no dezenvolve kona-ba stabilidade no presaun.

Ikus liu mak ho semináriu ne’e nu’udar parte ida husi finál rekerimentu nian iha matéria Drug Education and Vice Control ka edukasaun droga no vise kontrolu.

Bolseiru antes ne’e estuda mós iha Universidade Nasionál Timor Lorosa’e (UNTL), Fakuldade Siénsia Sosiál (FSS) haktuir, semináriu ne’e hetan apresiasaun di’ak husi komunidade no estudante sira.

“Hahú iha dader tuku 8:00 to’o 12:00 dader no kontinua fali loro-kraik, komesa fali husi 14:00 to’o 16:30 fó tan seminár ba estudante sira iha San José Integrated School City of San Fernando, iha apresiasaun di’ak”, informa bolseiru timoroan ne’e.

Entretantu, semináriu kona-ba anti droga ne’e lidera husi estudante Fakuldade Kriminolojia, Mark Justine Carreon nomós Mario no membru sira hanesan Daniella Guiao Soriano Baluyut Ryan, Jocel D. Jerry Poe, Timbol Mark Guevarra, Joshua Raymundo Soarez no Mário Precious Pineda inklui bolseiru Mário Soares.

Konselleiru turma mak profesór doutór Marlene M. Salangad.

Jornalista: Rafy Belo

Editora: Rita Almeida

HUSIK IDA HATÁN