Agora PN Analiza Mosaun Rejeisaun Hosi Opozisaun

0
330
Primeiru Ministru, Mari Alkatiri halo aprezentasaun programa governu iha PN, akompaña hosi membru governu sira.

DILI (TATOLI)—Parlamentu Nasionál (PN) hafoin halo apresiasaun ba programa sétimu governu durante loron hat (segunda-Kinta), ohin loro kraik ne’e, PN termina ona debate tanba la iha ona inskrisaun hosi deputadu sira ba meza ho nune’e meza termina debate hodi fó tempu halo analiza ba mosaun rejeisaun  ne’ebé opozisaun submete ona.

Prezidente Parlamentu Nasionál, Aniceto Guterres iha nia intervensaun dehan, la iha ona inskrisaun iha meza tanba ne’e meza deside termina debate.

“Haree ba giaun 1 pontu 3 debate termina, meza la halo rezume hosi primeiru dia to’o agora, meza ka’er liafuan ida hosi PM katak, nu’udar Primeiru Ministru, lider polítiku, sei ko’alia ho lider sira seluk atu entende malu,” Prezidente PN, Aniceto Guterres afirma iha nia intervensaun foin lalais ne’e iha PN.

Nia informa tan ba deputadu sira katak rezultadu debate hosi loron dahuluk to’o termina sei publika iha jornál Parlamentu Nasionál, ne’ebé oras ne’e daudaun tékniku sira PN nia prepara hela, hafoin ne’e hetan aprovasaun hosi plenária.

Iha oportunidade hanesan Prezidente PN autoriza bankada opozisaun sira hodi subkete kedan Mosaun resensaun ba meza Parlamentu Nasionál, hafoin simu tiha mosaun resensaun ne’e meza PN deside plenária intervalu hodi nune’e fó biban ba meza atu halo analiza ba mosaun resensaun.

“Meza suspende lai 15 ate meiu oras atu verifika mosaun ne’ebé tama, agora oras 15:59 minutu, ita fila fali mai 4:30  minutu,” Aniceto anunsia.

Antes ne’e, Primeiru-Ministru (PM), Marí Alkatiri fó hanoin ba deputadu nain 65 iha uma fukun katak demokrasia ne’e reprezentativa maibé realidade deputadu sira rasik la-reprezenta povu tomak.

“Ha’u hatene katak demokrasia ne’e reprezentativa signifika Parlamentu Nasionál (PN) mak uma fukun boot liu ba ita nia rai ne’ebé reprezenta povu maibé ita hotu hamutuk la-reprezenta povu tomak, hakarak ka lakohi ida ne’e mak realidade,” Mari Alkatiri afirma.

Xefe governu dehan, deputadu sira hamutuk no reklama katak sira mak reprezentante povu, maibé realidade povu la fó votu 100% ba partidu lima de’it, tanba ne’e sira ne’ebé laiha PN iha espetativa boot no hein katak bainhira lei fó dalan ba seluk hodi tuur iha uma fukun, tenke mós reprezenta sira nia hakarak.

Espetativa ne’e la’ós sira ne’ebé fó votu mai ita mak iha espetativa, sira ne’ebé la vota mai ita mós iha espetativa. Tanba ne’e mak ema iha governu la’ós de’it FRETILIN no PD, maibé husi partidu seluk mós tanba atu responde ba espetativa jerál.

“Povu iha espetativa boot tebes, povu hakarak ita hamutuk rezolve sira nia nesesidade maibé ita dala barak konfunde interese povu nia ho interese ida-idak nian. Interese povu nian ho interese partidu nian. Interese povu nian ho interese polítika ita nian rasik. Ida ne’e kestaun interese.”

(Jornalista: Julia Chatarina)

(Editór : Manuel Pinto)

HUSIK IDA HATÁN