Administrasaun Justisa Presiza Moderniza

0
206
Ministra Justisa, Maria Ângela Carrascalão

DILI, (TATOLI) – Ministra Justisa, Maria Ângela Carrascalão, informa polítika ne’ebé agora dadaun halo mak dezenvolve setór judisiál hodi halo modernizasaun ba administrasaun justisa.

“La iha buat ida para. Ha’u la dehan katak sala iha tinan 10 ne’e, maibé tenke melloria balun”, hatutan Maria Ângela Carrascalão ba profisionál komunikasaun sosiál sira iha Ministériu Negósiu Estranjeiru no Kooperasaun (MNEK), Praia dos Coqueiros, Dili, sesta (27/10).

Nia hatutan tan: “Ha’u ko’alia ona ho diretór sira, reuniaun ona ho diresaun sira. Ha’u rona, sira hotu-hotu ko’alia difikuldade ne’ebé sira hetan iha servisu prizionál, servisu rejistu i notariadu, terras e propriedade. Purtantu, buat hirak ne’e hotu-hotu tenke hadi’a”.

Tuir nia, justisa ne’e ko’alia diretamente ho povu ho atendimentu ne’ebé tenke di’ak.

“Atendimentu di’ak, konfiansa ba justisa mós sei di’ak liutan oituan. Ha’u mós hato’o ona ba ha’u-nia diretór sira katak importante impresaun ne’ebé sira fó ba povu katak ita hotu-hotu interesadu rezolve populasaun nia problema sira kuandu mosu”, katak eis-dekana Fakuldade Direitu, Universidade Nasionál Timor Lorosa’e (UNTL) ne’e.

“Tenke rezolve didi’ak hotu ho transparánsia, rigor, imparsialidade. Ne’e mak ha’u hanoin, ne’e mak importante, modernizasaun sistema justisa, atu altera la’e maibé atu halo de’it evolusaun, atu buat ne’e sai di’ak liutan”, reforsa.

Polítika kona-ba sosialiazaun lei rai, ministra Maria Ângela Carrascalão dehan, lei ne’e entra ona iha vigór maibé sei iha tan lei komplementár balun atu bele ajuda.

Tuir nia, lei rai só bele implementa ho didi’ak kuandu kumpleta ho lei komplementár seluk.

“Purezemplu sistema kadastru nian, ita tenke haree ida ne’e ho didi’ak. Agora lei ida ne’e kuandu implementa ita tenke simu. Gosta ka la gosta, ita hotu-hotu moris iha estadu direitu nia okos, ita hotu-hotu tenke respeita sá mak iha konstituisaun”, governante ne’e esplika no hakotu.

Jornalista: Rafy Belo

Editora: Rita Almeida

HUSIK IDA HATÁN