Aban, Governu Submete Programa ba Parlamentu Nasionál

0
214
Foto espesiál

DILI, (TATOLI) – Programa Governu Konstitusionál Dahituk nian ne’ebé sei submete ba Parlamentu Nasionál  iha aban, loron 10 outubru 2017 maka kombate hasoru izolamentu hodi foka liu ba enklave Oekusi Ambenu no Illa Ataúru nomós kestaun kona-ba delimitasaun definitiva no defeza ba ketan ka fronteira sira nafatin horik iha prioridade.

Tuir Portál Governu Timor-Leste nian ne’ebé TATOLI asesu ohin, prioridade programa nian seluk mak kriasaun infraestrutura sira ne’ebé iha kualidade, hadi’a prestasaun servisu públiku sira, liuliu iha saúde no protesaun sosiál, dezenvolvimentu ekonomia no dezenvolvimentu kondisaun moris timoroan sira-nian.

“Edukasaun, saúde, empregu no kapasidade ekonómika timoroan sira-nian identifika ona hanesan área sira ne’ebé sei hetan intervensaun prioritária. Ba área sira ne’e Governu propoin kriasaun modelu foun ida husi dezenvolvimentu globál no integradu, sustentadu iha konsolidasaun husi finansas públikas”, komunikadu ne’e hatete.

Objetivu polítiku boot maka fó ba ema sira kualidade moris nian ne’ebé di’ak liu, ho asesu ne’ebé haree liu ba enerjia no bee moos, ai-han no hela-fatin ne’ebé di’ak liu. Ba ida-ne’e, propoin atu fó kondisaun ba envolvimentu ida ne’ebé boot liután no inisiativa husi populasaun, husi asosiasaun sira no husi setór privadu.

Governu garante katak programa hirak ne’e hatán ba “prosesu harii Timor-Leste ida ne’ebé inkluzivu, justu no prósperu liután, ho biban ne’ebé hanesan ba ema hotu”, nu’udar define ona iha Planu Dezenvolvimentu Estratéjiku, no halo tuir Objetivu sira husi Dezenvolvimentu Sustentavel. (ki)

HUSIK IDA HATÁN