PN Sei Halo Konsensu Atu Nomeia Membru KSDS

0
109
Prosesu eleisaun sekretu ba membru Konsellu Estadu. Foto dokumentasaun relasaun públiku PN

DILI, (TATOLI) – Parlamentu Nasionál (PN) sei halo konsensu hodi nomea Konsellu Superior Defeza no Seguransa (KSDS) nain tolu no Konsellu Estadu nain lima.

“Eleisaun membru konsellu superiór defeza no seguransa nain tolu ne’ebé sei reprezenta Parlamentu Nasionál agora dadaun iha faze negosiasaun atu hetan konsensu, hodi nune’e submete ba eleisaun iha plenária tuir mai”, hatete Sekretária Meza PN, Lídia Norberta ba jornalista sira iha uma fukun, ohin.

Alende ne’e, líder bankada sira mós sei diskute subtituisaun André Belo L4 ba membru Konsellu Estadu tanba partisipa ona iha governu dahituk hodi asume kargu hanesan Sekretáriu Estadu asuntu Veteranu.

Antes ne’e PN halo eleisaun no hili ona KE nain lima hodi passa ho votu a favór 59, kontra 0 no abstensaun 2. Nune’e, membru KE eleitu mak Aurora Ximenes (FRETILIN), Virgilio da Costa Hornay (PD), Virgilio Smith (CNRT), André da Costa L4 (PLP) no José dos Santos (KHUNTO). Kriasaun órgaun ne’e bazeia ba artigu 90 konstituisaun RDTL.

Deputada hosi bankada Frente Revolusionariu Timor-Leste Indepéndente  (FRETILIN) ne’e hatutan, kandidatu sira tenke valoriza prinsípiu soberania no integridade nasionál tanba ne’e tenke iha lista únika ida ba membru tolu ne’e no kandidatu sei la reprezenta partidu maibé reprezenta órgaun lejislativu.

“Bainhira reprezenta Parlamentu Nasionál signifika sira reprezenta povu tomak, kualker deputadu ne’ebé iha bele kandidata-án maibé husi deputadu nain 64 (Prezidente Parlamentu Nasionál la inklui) bele reprezenta tanba ne’e mak hakarak hetan votu unaminidade tenke iha lista únika”, informa tan portavoz meza PN.

Nia dehan tan, kritéria báziku atu hetan lista únika mak konsensu, normalmente faze negosiasaun mak lori tempu maibé la’ós difísil tanba tuir nia kandidatu hotu priense rekezitu soberania no integrasaun nasionál, nune’e hotu-hotu iha kapasidade atu tama elejibilidade.

Nomeiasaun membru KSDS bazea ba artigu 148 konstituisaun RDTL (konsellu superiór defeza no seguransa) alinea 1. Konsellu Superiór Defeza no Seguransa nian mak nu’udar Prezidente Repúblika nia órgaun konsultivu kona-ba asuntu defeza no soberania nian. Alinea 2. Prezidente-Repúblika maka prezide Konsellu Superiór Defeza no Seguransa nian, ne’ebé tenke hatama ema sivíl no militár sira, maibé ema sivíl maka iha reprezentasaun barak liu. Alinea 3. Lei maka define Konsellu Superiór Defeza no Seguransa nia kompozisaun, organizasaun no nia kna’ar.

Jornalista: Julia Chatarina

Editora: Rita Almeida

HUSIK IDA HATÁN