DILI, (TATOLI) – Prezidente Institutu Petróliu no Jeolojia, Helio Casimiro Guterres, hateten governu Timor-Leste no Indonézia sei asina téknika nota intendementu (Memorandum of Understanding-MoU) ida iha área rai nakdoko (terramoto).
Governasaun anterior, Ministériu Obrás Públikas nasaun rua konsege asina ona nota intendementu. “Asina entre governu intermus polítika maibé presiza asina téknika idaʺ, dehan nia ba jornalista sira hafoin informa kestaun ne’e ba Prezidente Repúblika, Francisco Guterres Lú Olo iha Palásiu Presidensiál Bairo-Pite, ohin.
Durante ne’e, institutu servisu hamutuk ho Badan Meteorologi Klimatologi dan Geofisika hodi asesu informasaun kona-ba rai nakdoko.
Tuir nia, bainhira governu rai rua estabelese ona nota intendementu maka Timor-Leste sei asesu dadus antigu no foun kona-ba rai nakdoko ne’ebé akontese ona iha rai laran.
ʺHo nota parseria ne’e, Timor-Leste bele asesu dadus antigu no atuál kona-ba rai nakdoko nian ne’ebé sira akapta atu bele atualiza fali iha ita raiʺ, hatutan.
Xefe Estadu hateten, nota ne’e sei asina hafoin funsionamentu setímu governu la’o di’ak.
Jornalista: Agapito dos Santos
Editora: Rita Almeida
