DILI, (TATOLI) – Opozisaun Aliansa Maioritária Parlamentár (AMP) konsidera Primeiru Ministru, Marí Alkatiri halo referendum programa governu ba povu nu’udar aktu ne’ebé kontra Konstituisaun Repúblika Demokrátika Timor-Leste (RDTL) artigu 66 alinea 3.
“Konstituisaun RDTL artigu 66, alinea 3 hateten klaru katak tuir Lei-Inan labele hala’o referendum kona-ba sasan kompeténsia exluzivu ba Parlamentu Nasionál, Governu ka Tribunál nian”, esplika Xefe Bankada Kongresu Nasionál Rekonstrusaun Timor (CNRT-sigla portugés), Arão Noé liuhosi konferénsia imprensa iha Parlamentu Nasionál, tersa (24/10).
Enkuantu, Xefe Bankada Partidu Libertasaun Populár (PLP), Fidelis Magalães, hateten dalan ida naran referendum programa governu ba povu ne’e lei la fó dalan, entaun governu ida la konsege avansa ba oin tenke fó fila ba partidu segundu mais votadu eh eleisaun antesipada.
“Ami la-hatene katak governu halo referendum programa governu ba povu, laiha dalan konstitusionál atu sira halo, nune’e tanba programa governu hanesan materiál normál”, dehan Fidélis.
Sé opsaun atu konsulta povu, ne’e kompeténsia governu nian. “Ami lakohi interfere, maibé iha interpretasaun ida katak sei lori materia governu nian ba referendum ne’e mak ami dehan katak lei la fó dalan”.
Hatan ba kestaun ne’e, Xefe Banakda Frente Revolusionária Timor-Leste Indepéndente (FRETILIN), Francisco Branco esplika, Primeiru Ministru, Marí Alkatiri halo kampaña no halo referendum ne’e sala tanba programa ne’e lori ba atu konsulta de’it ba povu no dizemina programa governu nian ne’ebé aprezenta iha Parlamentu Nasionál (PN).
“Ami hosi kuadru Fretilin nia sei tun ba munisípiu hotu hodi dizemina programa governu hodi konsulta eh referendum povu nia hanoin ba programa ne’e atu bele hetan dadus hodi komprova hanoin”, realsa nia.
Jornalista: Zezito Silva
Editora: Rita Almeida
