DILI (TATOLI) – Ministru Defesa no Seguransa, Agustinho Siqueira “Somotxo” iha konferensia imprensa ne’ebé realiza iha Kuartel Jeral F-FDTL (Falintil-Forsa Defeza Timor-Leste) Fatuhada, Kinta (12/10) husu ba komunidade tomak hotu hodi kontribui lori estabilidade nasaun Timor-Leste ba oin.
“Ita hotu hatene katak, estabilidade no paz ba nasaun importante ba ita. Ne’e duni husu ba komunidade sira hotu, politiku sira, joventude sira, mai ita hotu partisipa, akompaña no fó apoiu atu estabilidade no paz lao diak”, afirma.
PNTL no F-FDTL nia servisu mak atu garante estabilidade, paz no seguransa permanente ba povu Timor-Leste iha rai ida ne’e, maibe tenke hanoin mos katak atu garante estabilidade ida ne’e responsabilidade ita hotu nian.
Nune’e nia dehan tan, ba joven sira, intelektual no jurista sira ne’ebe hatene lei, ohin loron liberdade maibé wainhira hakarak atu organiza manifestasaun ruma hasoru prosesu leilaun kareta Prado ne’e atu la’o tuir prosedementu liuhosi prosesu ida. Hanesan petisaun ka audensia ida ba parte kompetente, labele derepente deit halo manifestasaun.
“Ba komunidade tomak, ba hau nia veteranus sira husi rejiaun 1- 4, joven sira husi organizasaun rezistensia, atu dehan deit katak ita liberta ona husi dominasaun no agora ita iha dever hamutuk hodi liberta povu ida ne’e, ne’e duni mai ita hotu kontribui atu lori ita nia nasaun ba oin”, katak.
Iha konferensia ne’e, Ministru Somotxo akompanha husi Komandante das F-FDTL, Maijor Jeneral Lere Anan Timur, Komandante Jeral Polisia Nasional Timor-Leste (PNTL), no Komisariu Polísia, Julio Hornay.
Hetan mos prezensa husi Vice Chefe Estado Maior General F-FDTL Brigadeiro General Filomeno da Paixão, Chefe Estado Maior F-FDTL Coronel Falur Rate Laek, Segundu Komandante Jeral PNTL, Komisáriu Polisia Faustino da Costa nomós ofisiais husi F-FDTL no PNTL nian.
(Jornalista: Julia Chatarina)
(Editór : Manuel Pinto)
