DILI, (TATOLI) – Formadór Institutu Apoiu ba Dezenvolvimentu Emprezariál (IADE), Boubito Lemos hatete governu konstitusionál da-hituk, liuliu Sekretáriu Estadu Juventude no Traballu (SEJT) presiza tau planu orsamentu ba programa sentru juventude munisípiu tanba sira iha poténsia tebes atu serbí iha sira-nia munisípiu.
“Razaun fundamentál tanba sira lapresiza buka serbisu hotu atu tama iha Governu maibé sira hakarak kria rasik sira-nia servisu no fó servisu ba ema seluk liuliu iha sira-nia munisípiu”, informa tan Boubito bainhira fó formasaun ba sentru juventude husi munisípiu 12 inklui Rejiaun Autónoma Espesiál Oekusi-Ambeno (RAEOA), horisehik, sobre planu negósiu nian iha sede suku Bekora.
Treinadór ne’e hatete juventude husi munisípiu Vikeke, Manufahi no Baukau iha kompreensaun boot kona-ba planu negósiu nian. Aleinde ne’e sentru juventude sira husi munisípiu 12 inklui REAOA iha planu no ideia negósiu ida diferente tanba bazea ba poténsia iha munisípiu lahanesan.
“Balun iha ortikultura hanesan Aileu, Ermera no Lospalos kona-ba haki’ak animál, iha Vikeke ho Manatutu kuda fore-keli no fore-mungu. Husi parte Baukau iha poténsia kuda modo no halo produtu lokál hanesan dezenvolve mina-nuu”.
Ho kapasidade ne’ebé sentru juventude sira iha, formadór ne’e hatutan tan, governu presiza tau atensaun tanba jerasaun foun mai iha koñesimentu natoon no jestaun ladi’ak ita sei oukupa husi negosiante rai-liur.
“Karik sira hatene jestaun, halo planu di’ak, sira bele lori nasaun Timor-Leste ne’e bá oin entaun presiza atensaun boot ba iha planu sentru juventude ihaTimór laran tomak”.
Jornalista: Maria Auxiliadora
Editora: Rita Almeida
