Veneranda Lemos Entrega Sertifikadu Apresiasaun ba PM

0
64
Sekretária Estadu, Veneranda Lemos entrega sertifikadu apresiasaun ba Primeiru Ministru ba apoiu durante tinan rua ho balun. Serimonia ne'e hala'o iha edifisiu SEM Kaikoli, ohin. Foto GPM

DILI, (TATOLI) – Sekretariu Estadu ba Apoiu Promosaun Sosiu Ekonómika Feto, Veneranda Lemos Martins, ohin, entrega sertifikadu apresiasaun ba Primeiru Ministru (PM), Rui Maria de Araújo tanba fó ona apoiu másimu ba dezenvolvimentu igualdade jeneru durante mandatu governu da-hitu.

“Sertifikadu ne’e ami fó tanba dedikasaun ne’ebé xefe governu fó durante tinan rua ho balun, sertifikadu ami fó rua, ida husi  diretór jerál no estrutura tomak no ida husi ha’u hanesan sekretariu estadu tanba apoiu ba dezenvolvimentu igualdade jeneruʺ, dehan nia hafoin entrega sertifikadu apresiasaun ne’e iha edifísiu Sekretariu Estadu, Kaikoli.

Durante tinan rua ho balun, nia informa, konsege alkansa  programa sosiu ekonómika feto, rezolusaun 1325 ne’ebé hateten feto pás no seguransa, indikadór jeneru no programa importante seluk ba promosaun igualdade jeneru.

Oportunidade ne’e, tuir xefe governu katak partisipasaun feto iha vida polítika tenke barak liutan.

“Ita suporta barak ona maibé ha’u hakarak lansa dezafiu ida atu tinan lima oin mai prioridade ida tenke halo promosaun ba feto barak liutan para tama iha vida polítika hodi toma responsabilidade iha desizaun hotu relasaun ho estadu nia vida”, argumenta.

Hatutan mós presiza fó formasaun ba feto nivel nasionál, nune’e identifika feto sira ne’ebé oras ne’e tuur ona iha administrasaun públika fó formasaun ba seluk tanba sira kumprende kle’an konaba sistema administrasaun públika, lei no orsamentu jerál estadu kada tinan.

“Ita presiza deputadus barak liutan feto, ita presiza feto barak liutan tuur iha governu atu hetan ida ne’e ita presiza halo formasaunʺ, katak tan.

Mandatu governu da-neen membru governu feto hamutuk nain hitu husi membru governu haat nulu resin rua. Enkuantu husi Parlamentu  Nasionál feto sanulu resin hosi total 65.

Jornalista: Agapito dos Santos

Editora: Rita Almeida

HUSIK IDA HATÁN