Valoriza Masakre 12 Novembru ho Torneiu

0
43
Jogadora feminina. Foto: FMSS

DILI, (TATOLI) – Asosiasaun Akadémika Estudantil, Fakuldade Medisina, Siénsia no Saúde (AAE-FMSS), Universidade Nasionál Timor Lorosa’e (UNTL) realiza torneiru volleyball, baskete no futeból salaun (Futsal) hodi hadau taxa rotativa périodu daruak nian.

jogadór maskulinu. Foto: FMSS

Objetivu husi torneiru ne’e mak hodi bele hametin liutan dame, domin, unidade no respeitu hodi valoriza espiritu aas wa’in Masakre 12 novembru 1991 no hametin lasu amizade entre estudante sira iha fakuldade.

“Ita hakarak hamosu ambiente ne’ebé hatene respeitu ema, ambiente ne’ebé dame hodi nune’e ita valoriza espiritu aas wa’in 12 novembru”, hateten prezidente interinu, AAE-FMSS, Riberto Joma dos Reis iha abertura torneiu iha Kampus Kaikoli-Dili, sábadu (30/9).

Eroi sira ne’ebé luta iha 12 novembru, sira hakarak rai Timor, ema hotu livre, ema hotu moris di’ak, ema hotu moris iha dame. “Ita hatutan, ita la’o tuir sira-nia ain-fatin”, reforsa.

Agora la’ós luta hasoru inimigu, ita agora luta atu ema hotu iha Timor-Leste bele moris goza. Tanba ne’e, ho jogu, ita valoriza sira-nia luta.

Uluk eroi sira see sira-nia hirus-matan ba kilat musan, ema soke sira ho eletrisidade, ohin loron bele goza, bele mai eskola livre, hamnasa, haksolok la’o iha dalan.

“Agora hatutan sira-nia valór luta iha ita-nia rain, ita-nia fakuldade nomós ita-nia komunidade”, prezidente interinu AAE-FMSS, Riberto Joma fó hanoin.

Dekanu FMSS, João Martins akresenta ho atividade ne’e relembra fila-fali sakrifísiu ne’ebé joven sira halo iha 12 novembru 1991, tinan 26 liubá.

Forsa Armada Libertasaun Nasionál Timor-Leste (FALINTIL) sira ho inimigu hasoru malu, tiru malu kilat ho kilat enkuantu joven sira iha 1991 ne’e liman mamuk hasoru militár.

“Sakrifísiu ne’ebé mak sira halo, nia rezultadu mak ohin loron ne’e”, Dekanu FMSS ne’e reforsa.

Nia akresenta, nasaun agora la presiza hasoru ho fatuk, kilat maibé matenek no dedikasaun atu servi di’ak liutan.

“Agora ita goza, se ita konsiente di’ak, ita fahe ita-nia goza ne’e ba ita-nia maluk sira ne’ebé seidauk goza, ida ne’e mak importante tebes”, akresenta.

Nia hatutan, karidade importante, la’ós de’it iha vida relijioza nian maibé mós iha vida sosiál, moris hamutuk ho komunidade sira, presiza fahe saida mak bele fó. “Sei la halo ki’ak ita, sei hetan valór sira ne’ebé boot tebes”, dekanu subliña.

Dekanu FMSS, João Martins fó hanoin ba estudante no jogadór sira katak tenke halo jogu ho desportivu, labele kria violénsia hodi kontribui mós ba pás no estabilidade. Se kria instabilidade bele fó imajen ladi’ak ba fakuldade nomós ba universidade.

“Imi tenke haki’ak valór dame nian, hadomi malu nian, la violentu. Ida ne’e mak importante ba jogadór sira”, sujere.

Torneiu ne’e realiza tan kontribuisaun individuál estudante, estrutura fakuldade nomós empreza timoroan ida ho naran STAR PRINTING.

Grupu sira ne’ebé mak partisipa iha torneiu ne’e mak futsál (grupu mane 14), volley (grupu feto de´it hamutuk neen), baskete (grupu mane walu, feto walu).

Modalidade jogu Futsál sei hala’o iha salaun Futsál, Bebora-Dili, volley hala’o iha kampus FMSS, Kaikoli no baskete sei hala’o iha eskola primária Nuu-laran Bairo Formosa, Dili.

Atribuisaun taxa rotativa sei realiza iha komemorasaun 12 novembru. Taxa ne’e tinan kotuk iha departamentu medisina jerál tanba departamentu ne’e mak sai nu’udar kampiaun.

Jornalista: Rafy Belo

Editora: Rita Almeida

HUSIK IDA HATÁN