UNTL Aprezenta Rezultadu Peskiza Sientífiku

0
56
Autoridade UNTL durante simpóziu datoluk. Foto: Media UNTL

DILI, (TATOLI) – Universidade Nasionál Timor Lorosa’e (UNTL) hala’o simpóziu edukasaun ba datoluk hodi fó sai rezultadu peskiza sientífiku ne’ebé mak akadémiku eh universitáriu sira halo no peskiza iha terenu no komunidade sira ho tópiku temátiku oi-oin.

Partisipante simpóziu datoluk. Foto: mídia UNTL

Simpósiu ne’e organiza husi Unidade Produsaun no Diseminasaun Koñesimentu  (UPDK) no Fakuldade Edukasaun, Arte no Umanidade (FEAU), UNTL, durante loron rua, hahú ohin no termina aban.

Reitór UNTL, Francisco Miguel Martins informa simpóziu ne’e profesór timoroan sira nomós estudante sira aprezenta sira-nia rezultadu peskiza empíriku iha kampu.

“Simpóziu ida ne’e importante tebes para eleva kualidade, sistema akadémiku iha Universidade Nasionál Timor Lorosa’e katak produsaun no diseminasaun koñesimentu”, hateten reitór universidade públika ba mídia sira iha kampus Liceu, UNTL, ohin.

Profesór no alunu sira la’ós de’it hanorin no rona malu de’it iha sala maibé aprofunda liutan sira-nia koñesimentu liuhusi peskiza sientífika no rezultadu ne’e komunika iha simpóziu.

“UNTL realiza sempre eventu sientífiku hanesan ne’e nomós konferénsia no simpóziu internasionál”, haktuir.

Reitór Francisco Miguel Martins hatutan, simpóziu sira hanesan ne’e nunka para maibé prosesu inísiu no sustentabilidade ida katak atividade ne’e bebeik tanba prosesu dezenvolvimentu siénsia ne’e liuhusi peskiza, diseminasaun no produsaun.

Enkuantu universidade sei iha área temátiku espesializadu sei hala’o bebeik. “Eventu ne’e hamosu bebeik atu eleva kualidade, koñesimentu, produsaun koñesimentu sei di’ak liutan ba sosiedade, país no prosesu dezenvolvimentu akadémiku”, reforsa.

Dekanu FEAU, Pedro Soares informa, aprezentasaun rezultadu peskiza sira ne’ebé mak profesór no estudante sira halo hodi disemina koñesimentu.

“Rezultadu sira ne’ebé iha labele husik nonok de’it depois la disemina ba ema seluk atu hatene, presiza disemina ba ema seluk, leitór, nune’e bele hakle’an koñesimentu akadémiku sira”, salienta.

Alunu sira ne’ebé forma iha UNTL, aban bainrua sai sidadaun ne’ebé kualifikadu atu kontribui ba dezenvolvimentu. “Siénsia ne’e la’ós estátiku maibé dinámiku, ita nunka deskobre fenómenu hotu ne’ebé mak iha globu ida ne’e”, dehan dekanu.

Hodi reforsa ho esforsu, kreatividade kontinua peskiza no depois bele hetan fenómenu ka akontesimentu iha globu ida ne’e. La iha peskiza ne’ebé mak la iha difikuldade, peskiza ne’e uza metodulojia oioin ne’ebé adekuadu.

“Obstakúlu labele sente hanesan bareira para que ita labele kontinua maibé obstakúlu sira ne’e konsidera hanesan motivasaun ida”, nia fó hanoin.

Entretantu tema prinsipál ba simpóziu datoluk UNTL nian ne’e mak: “Língua, Responsanbilidade Social, Gestão e Liderança Escolar”. Simpóziu ne’e rasik partisipa husi akadémiku sira inklui konvidadu sira.

Hafoin termina, aban, iha simpóziu ne’e sei lansa mós livru ida ho títulu: “Educação e Guerilha: Uma história de resistência em Timor-Leste” ho autór Samuel Penteado Urban.

Jornalista: Rafy Belo

Editora: Rita Almeida

HUSIK IDA HATÁN