Turizmu Timor-Leste Iha Buat Furak Barak Atu Oferese

0
48
Estudante Universidade Nasionál Timor Lorosa’e (UNTL), Jerónimo Magno. Foto/Facebook.

DILI, (TATOLI) – Turizmu Timor-Leste iha buat furak ne’ebé barak atu oferese ba ema rai-liur nune’e iha benefísiu liuliu termu ekonomia nian, maibé seidauk iha dezenvolvimentu ne’ebé másimu hodi fó benefísiu ba nasaun.

Estudante Universidade Nasionál Timor Lorosa’e (UNTL), Jerónimo Magno husi Departamentu Komérsiu no Turizmu hatete hanesan estudante ne’ebé estuda no halo peskiza iha parte turizmu nian atubele halo dezenvolvimentu ida ne’ebé mak di’ak no sustentavel ba turizmu Timor-Leste nian.

Jerónimo esplika turizmu iha Timor-Leste iha parte sira hanesan kultura nian, objetu turizmu ne’ebé atraeante ne’ebé atrai turista sira. “Iha ami-nia estudu liuliu peskiza sira ne’ebé halo buat ne’ebé atrai tebes liuliu iha kultura nian ne’ebé mak iha Timór, iha munisípiu 13 ho kultura ne’ebé lahanesan, hanesan iha Lospalos, iha uma adat ne’ebé lahanesan ho munisípiu sira seluk, ne’e bele atrai ema husi munisípiu ida bá Lospalos hanesan turista lokál”.

Aleinde ne’e iha Venilale, Postu Administrativu Baukau, iha nia ponte natureza ne’ebé mak laharii husi ema katak naturalmente natureza mak harii.

Atu dada ema mai vizita iha Timor-Leste mak tenke kria kondisaun ne’ebé mínimu iha parte nesesidade ne’ebé turista presiza, halo promosaun ba fatin sira no Governu presiza servisu hamutuk ho autoridade lokál no parte akadémika nian atu halo peskiza ida kle’an liu iha fatin sira ne’ebé daudaun ne’e iha poténsia turístika hodi ajusta hamutuk dadus sira ne’e hodi fó sai liuhusi promosaun iha mídia.

“Ita-nia fatin turístiku sira ne’ebé agora iha, buat ida ita presiza kria mak lei liuliu regulamentu atu buat sira ne’ebé iha labele fó gratuita de’it, ezemplu Kristu Rei, iha ne’ebá husi ami sukat katak iha semana ida bele fó mil ou mil e tal benefísiu ba nasaun maibé to’o agora gratuita, laiha regulamentu ida katak ema tama bele fó ekonomia”, Jerónimo hatete iha Kampus Rezende, UNTL, ohin.

Jerónimo husu iha loron mundiál turizmu nian (27/9/2017), ba joven sira katak estuda didi’ak iha parte turizmu nian no setór ne’ebé fó benefísiu aleinde mina no gás mak turizmu, nune’e halo konsentrasaun ne’ebé másimu iha turizmu atubele halo dezenvolvimentu ida di’ak liután hodi atrai turista sira husi rai-liur hosi hasa’e rendimentu ekonomia nian.

Hodi komemora turizmu mundiál, liuhusi inisiativa estudante Turizmu UNTL halo espozisaun atu promove vestuáriu tradisionál nian nomós artezanatu sira ne’ebé daudaun ne’e prodús rekursu produtu kulturál sira ne’ebé iha no sei realiza iha loron aban to’o sábadu semana ne’e.

Feliciano Quintas do Céu, dosente UNTL, Departamentu Komérsiu no Turizmu hatete papél akadémika nian hodi promove setór turizmu mak orienta estudante sira sai hanesan ajente importante ba dezenvolvimentu turizmu nomós sai tilun, ibun, liman no ain komunidade nian oinsá atu konsensializa komunidade atu komprende saida mak turizmu.

“Tanba turizmu setór ida importante atu kobre nomós alternativa ida ba reseita país, lalenok dezenvolvimentu iha ita-nia rai. Tanba ne’e Fakuldade Ekonomia komemora loron turizmu mundiál ho tema “Turizmu Sai Hanesan Instrumentu Ida Ba Dezenvolvimentu”, instrumentu tanba liuhusi nia, bele eleva no hamoris setór produtivu sira seluk hodi sai hanesan parte importante hodi kontribui ba nasaun”.

Sobre fatin turizmu sira, dosente ne’e hatete Tutuala iha munisípiu Lautein sai hanesan laboratóriu ba objetu turístiku tanba fatin ne’e iha illa Jako, Goa Ilikerekere, pakre Nino Koni Santana, Lagoa Iralalaru no iha eransa kulturál ne’ebé famozu liu no buat balun ne’ebé presiza esplora tan.

“Iha Maliana ita iha bee-manas Marobo nomós atrasaun turístika hanesan eransa  kulturál iha ne’ebá, monumentu istóriku ne’ebé koloniál sira husik iha ne’ebá. Illa Ataúru mós iha potensialidade lubuk ida liuliu ligasaun ho komunidade ne’ebé familiár ho bainaka ne’e ita tenke applause”.

Aleinde ne’e iha Timór laran kuaze munisípiu ida-idak iha nian potensialidade turístiku rasik mas presiza esforsu aan para iha futuru esplora ida ne’e sai hanesan patrimóniu Estadu no instrumentu atu dezenvolve país ne’e.

Jornalista: Maria Auxiliadora

Editora: Rita Almeida

HUSIK IDA HATÁN