Tour de Timor Kontinua La’o Mesmu Falta Orsamentu

0
96
Route Tour de Timor. Fonte: Tour de Timor

DILI, (TATOLI) – Fundadór Tour de Timor, José Ramos Horta hateten maske atividade Tour de Timor falta finansimentu maibé sei kontinua la’o hodi kontinua promove pás.

“Tinan ne’e nia laran iha difikuldade oioin liliu difikuldade finansimentu maske governu tulun di’ak maibé tanba mós situasaun polítika, tranzisaun governu foun, entaun ami mós serbisu barak”, hateten fundadór ne’e, horseik, iha Kampus Resende UNTL Universidade Nasionál Timor Lorosa’e (UNTL).

Apesar de situasaun ida ne’e, partisipasaun ba atividade Tour de Timor ne’e barak husi siklista nasionál nomós internasionál.

“Husi internasionál atus ida resin, timoroan. Ha’u fiar katak Tour de Timor sei sai susesu boot”, diplomata seniór, Ramos Horta garante.

Fundadór Tour de Timor ne’e mós informa hahú ezisténsia atividade siklizmu ne’e autoridade seguransa interna, Polísia Nasionál Timor-Leste (PNTL) inklui Falintil-FDTL (Forsa Defeza Timor-Leste) halo kolaborasaun di’ak loos.

“Nunka iha fallansu. Ne’e duni ha’u-nia team sira, sira halo dialógu no koordenasaun maka’as ho PNTL nomós FDTL”, haktuir.

Nune’e mós, Ministériu Saúde (MS), Ospitál Nasionál Guido Valadares, autoridade munisípiu nomós seluk tan. “Sira halo kolaborasaun di’ak tebes”, akresenta tan fundadór Tour de Timor ne’e.

Entretantu, tuir ajenda, atividade Tour de Timor sei hahú iha 19 to’o 23 fulan ida ne’e ho diresaun hanesan Dili, Aileu. Aileu, Maliana no Maliana Dili. Dalan sei taka durante route.

Jornalista: Rafy Belo

Editora: Rita Almeida

HUSIK IDA HATÁN