DILI, (TATOLI) – Konta Poupansa Ha’u-Nia Futuru iha progresu ne’ebé di’ak maibé infelizmente konsentrasaun sei kontinua nafatin iha Dili, Likisá, Baukau, Kovalima no Rejiaun Autónoma Espesiál Oekusi-Ambeno (RAEOA) uitoan no nia totál montante ne’ebé iha kuaze liu dólar millaun ida ona.
Governadór Banku Sentrál Timor-Leste (BSTL), Abraão de Vasconselos informa totál produtu poupansa ha’u-nia futuru ho labarik besik mil 10 mak iha tiha ona konta ha’u-nia futuru.
“Númeru ida di’ak, hanesan labarik kuaze mil 10 de’it nia totál tabungan hamutuk juta ida. Dili kontinua nafatin iha konsentrasaun kuaze liu 90%, ida ne’e tanba Dili mak inan-aman sira asesu liu informasaun duké munisípiu sira. Likisá tanba programa Banku Sentrál nian horibainhira tinan kotuk konsentra iha Likisá tanba ne’e mak populasaun sira iha ne’ebá komesa entende, labarik sira hatene entaun sira komesa loke konta poupansa ha’u-nia futuru ne’e”, Abraão hatete iha edifísiu BSTL, horisehik.
Sobre menus informasaun ba komunidade sira ba konta poupansa nian ne’e, maka BSTL iha programa intensiva ida ne’ebé servisu hamutuk ho Ministériu Edukasaun atu implementa programa literasia finanseira iha eskoan ensinu báziku no kada munisípiu iha profesór ida ho substitui ida mak sei implementa ida ne’e iha eskola.
“Iha modul sira ne’e inklui hotu produtu ha’u-nia futuru, espera katak efeitu ne’e sei iha médiu no longu prazu ita sei haree, no lahakfodak kuandu iha futuru mai ita bele haree produtu poupansa ne’e bele to’o cinco milhões, des milhões tanba ne’e la’ós buat ida imposivel iha Timór”.
Produtu poupansa ha’u-nia futuru nia vantajen la’ós de’it ba labarik sira maibé ba inan-aman hotu kuandu komesa agora hasai hela osan hodi tau ba iha konta oan sira-nia maka sei garante futuru no ida ne’e mak BSTL hakarak atu eduka populasaun.
“Objetivu programa ne’e mak hakarak eduka ita-nia oan sira aban-bainrua sira boot ne’e, sira iha responsabilidade ba sira-nia destinu finanseira rasik labele depende nafatin ba inan-aman”.
Programa konta labarik ha’u-nia fututru ne’e lansa husi BSTL iha loron 28 agostu 2015 atu enkoraja labarik sira hodi deskobre benefísiu hodi rai osan iha banku no haree rasik sira-nia depózitu ne’e sai hanesan kontribuisaun ne’ebé kle’an no interese atu hasa’e liután balansu. Programa ne’e foka liu bá labarik timoroan sira hotu ho tinan 17.
Benefísiu sira sei tau ba konta labarik nian no sei la halo kobransa hosi parte banku nian tanba selu impostu sei la aplika ba konta hanesan ne’e no sei hetan tan funan taxa merkadu. Sei la autoriza halo levantamentu ou uza halo pagamentu hosi konta refere to’o konta na’in atinji tinan 17.
Jornalista: Maria Auxiliadora
Editora: Rita Almeida