TL Rejeita Vingansa Hakarak Dame

0
203
Representativu permanente Timor-Leste iha Nasoens Unidas, Maria Helena Pires. Foto: UN web tv

DILI (TATOLI) Prezidente Repúblika (PR) Francisco Guterres Lú Olo afirma, Timor-Leste nia prestasaun importante liu durante tinan sanulu resin lima nia laran mak, dezenvolvimentu dame no rekonsiliasaun iha nivel nasionál ho internasionál no lakohi vingansa.

“Dame no rekonsiliasaun posivel ba vizaun lideransa sira, ho korajen atu rejeita vingansa no mós konformidade povu Timor-Leste iha territóriu tomak ba vizaun ne’e,” Mensajen PR Lú Olo le hosi reprezentativu permanente Timor-Leste (TL) iha Nasoens Unidas, Maria Helena Pires iha sesaun debate jerál ba dala 72 asembleia jerál Nasoens Unidas, Segunda (25/9) iha Nova Iorke.

Prezidente Repúblika Francisco Guterres Lu Olo realsa, Timor halo ona relasaun amizade no kooperasaun serbisu hamutuk ho Indonézia no mós Austrália, nune’e mós reforsa relasaun ho nasaun ASEAN ne’ebé hanesan asosiasaun Timor Leste atu tama. Nune’e reforsa integridade regional Timor-Leste hanesan prioridade prinsipál polítika estranjeiru nasaun nian.

Liuhosi biban ne’e, nu’udar PR Lu Olo mós hato’o nia félisitasaun ba komemorasaun tinan 50 ASEAN no konsidera asosiasaun ne’e nia kontribuisaun ne’ebé halo mudansa iha sudeste aziátiku sai hanesan rejiaun ida mak seguru, estabilidade, demokrátiku no mós prósperu liután, iha nivel dezenvolvimentu ne’ebé as iha mundu no oferese hasae prosperidade ba ema hotu iha rejiaun ne’e.

Ba Timor-Leste, Tuir Xefe Estadu, agora alkansa ona dame no estabilidade, hodi hakat ona ba tentativa atu kria kondisaun ba dezenvolvimentu ekonómiku no sosiál, inklui hadi’a kondisaun dezenvolvimentu ba empreza ki’ik, setór públiku no privadu, no mós halo promosaun ba diversifikasaun ekonómiku non-petrolíferu tuir objetivu ne’ebé determina ona iha planu dezenvolvimentu Timor-Leste ne’ebé aprova iha tinan 2011-2030 katak Timor sei hamutuk ho nasaun sira ne’ebé ho rendimentu natoon aas, rezolve kiak no kria ekonómiku non-petrolíferu ne’ebé sustentável no oin-oin.

(Jornalista: Julia Chatarina)

(Editór : Manuel Pinto)

HUSIK IDA HATÁN