TL-Austrália Hetan Ona Akordu Atu Finaliza Disputa Fronteira Marítima

0
413

DILI, (TATOLI) – Liuhosi enkontru konfidensiál ho komisaun konsiliasaun semana kotuk iha Kopenhaga, Timor-Leste (TL) no Austrália hetan ona akordu atu finaliza disputa fronteira marítima ne’ebé hatudu elementu sentrál husi tasi timor ho estimasaun óliu no gas hamutuk US$40 billaun.

Tuir komunikadu ne’ebé ajénsia TATOLI asesu husi tribunál internasionál arbitrajen, detallu husi enkontru ne’e seidauk bele fó sai ba públiku antes enkontru ida tan hodi finaliza akordu entre parte rua ne’ebé sei realiza iha fulan-outubru tinan ne’e.

Tribunál hateten akordu ne’e ko’alia kona-ba kampu gas Greater Sunrise no sei forma rejime ida atu bele fahe lukru. Parte rua hapara hela esplorasaun iha kampu ne’e hodi rezolve no hetan solusaun.

Xefe negosiadór, Xanana Gusmão agradese ba komisaun tanba bele lori ona parte rua hodi bele tur hamutuk husi prosesu ne’ebé naruk no hetan difikuldade bele ona realiza mehi ba soberania no rezolve fronteira marítima ho Austrália.

“Ida ne’e hanesan akordu istóriku no sinál inísiu era foun husi amizade entre Timor-Leste no Austália”, tenik.

Nune’e mós ajente TL, Agio Pereira hateten, akordu ne’e possível tanba forsa no lideransa husi aman nasaun, Xanana Gusmão ne’ebé servisu ho komisaun no Austrália atu garante soberania polítika, ekonómika nomós futuru ba povu sira.

Iha parte seluk Ministra Negósiu Estranjeiru Austrália, Julie Bishop hateten hanesan loron importante ba relasaun entre TL no Austrália. Akordu ne’e suporta interese nasionál husi nasaun rua, haforsa relasaun ba tempu naruk no entre governu.

“Ha’u agradese ba komisaun tanba bele lori parte rua hosi bele tur hamutuk”.

Prezidente Komisaun Konsiliasaun, Peter Taksøe-Jensen elojia parte rua tanba bele hetan solusaun ne’ebé justu no ekuilibradu ne’ebé fó lukrativu ba TL no Austrália.

Negosiasaun ne’e bele hetan solusaun di’ak tanba korajen no intensaun di’ak husi líder parte rua.

Jornalista: Julia Chatarina

Editora: Rita Almeida

HUSIK IDA HATÁN