Timor Solidariza Komunidade Rodiña

0
84
Refujiadus Rodiña

DILI (TATOLI)-Timor Leste indireta liuhosi Movimentu Solidariedade Internasionál Timor-Leste (MSITL) hato’o sentidu solidariedade ba komunidade Rodiña, iha Myanmar (Burma).

“Ami hamriik hamutuk ho maluk sira seluk iha fatin hotu atu protesta persegisaun ne’ebé halo hasoru komunidade Rodiña,” deklara MSITL liuhusi komunikadu dirije mai redasaun ajénsia Tatoli, ohin.

MSITL esplika, asaun violénsia sira ne’ebé akontese hasoru komunidade Rodiña dezde Outubru 2016 husi forsa militár Myanmar sira ne’e hanesan trajédia ida kontra umanidade.

Asaun militár ne’e rezulta ona ema Rodiña barak mak hetan oho no barak mak obrigatóriamente halai sai husi sira nia hela fatin atu ba buka mahan iha Bangladesh.

Iha semana rua ikus ne’e de’it ema liu rihun atus rua mak husik hela sira-nia hela-fatin tanba persegisaun ne’ebé halo hasoru sira.

“Ne’e-duni, ami hakarak husu ba Governu Myanmar atu hapara imediatamente aktu persegisaun militár ne’ebé oras ne’e halo hasoru komunidade Rodiña sira,” MSITL husu.

MSITL enkoraja governu Myanmar atu hatudu ninia kometimentu liuhusi asina tratadu internasionál sira liu-liu, Konvensaun Internasionál kona-ba Direitu Sivíl no Polítiku; Konvensaun Internasionál kona-ba Direitu Ekonómiku, Sosiál no Kulturál.

Atu sai membru ba Tribunál Kriminál Internasionál, no konvensaun direitus umanus sira seluk kona-ba Tortura, Refujiadu, Eskravidaun, Diskriminasaun bazeia ba Rasa, Apatridia (Estadu la iha), no ema lakon obrigatóriu sira.

Husu ba Nasaun Unida no governu nasionál sira atu bele foti asaun hodi ezije Governu Myanmar atu kumpre sira-nia devér sira tuir lei internasionál sira. Sujere atu Governu Myanmar promove diálogu, nu’udar dalan Pasífiku ba hetan dame, la’ós liuhusi violénsia.

Husu ba ativista solidariedade internasionál sira atu hamutuk ko’alia hasoru aktu persegisaun ida ne’e, no atu promove nafatin prinsípiu universál Direitus Umanus nian iha rai sira ne’ebé daudaun ne’e krize direitus umanus nian la’o hela.

Husu ba rai hotu-hotu ne’ebé komunidade afetadu husu protesaun ba, atu labele nega sira nia direitu ba seguransa no moris, hodi fó fatin ba sira hela no fornese ba sira buat ne’ebé sira merese basa sira presiza tebes ajudu umanitáriu internasionál sira ne’e, haree ba sira nia situasaun atuál.

“Artigu 10 husi ami-nia konstituisaun RDTL hatete katak Timor-Leste sei solidáriu ba Povu hotu ne’ebé luta ba libertasaun nasionál,” MSITL akresenta.

Hodi reforsa katak Repúblika Demokrátika Timór-Leste fó azilu polítiku, tuir lei haruka, ba ema rai seluk sira ne’ebé persigidu tanba sira-nia luta ba libertasaun nasionál no sosiál, defeza ba direitus umanus, demokrasia no dame.

“Prinsípiu legál hirak ne’e adopta ona ho ninia baze vitória istóriku ida hasoru opresaun, ne’ebé ami nia povu rasik liu ona,” MSITL esplika.

Tanba ida ne’e, liu husi karta simples ida ne’e ami hato’o ami nia preokupasaun no solidariedade ba povu maluk komunidade Rodiña ne’ebé hetan oho no terus oin-oin. Ami mós husu ba estadu Timor-Leste atu ezerse nia obrigasaun morál no legál hodi hato’o mós preokupasaun umanitáriu hodi ajuda hakotu lalais krize umanitária iha rai Myanmar.

“Ami espera katak ita tempu badak ema sira ne’ebé hetan oho, sira nia isin mate sei haloot ho dignu, no ema sira ne’ebé buka hela fatin mahan sira iha fatin seluk, bele hetan duni protesaun husi komunidade sira iha fatin ne’ebé komunidade persegidu sira ne’e halai ba,” MSITL hein.

Entretantu karta solidariedade ne’e hetan asinatura husi estudante, individuál no autoridade organizasaun sosiál sira balun.

(Jornalista: Rafy Belo)

(Editór : Manuel Pinto)

 

HUSIK IDA HATÁN