Timor Moeda Sentavu Di’ak Liu Duke Osan Tahan

0
171
Vise Governadora, Banku Sentrál Timor-Leste (BSTL), Sara Brites. Foto/Egas Cristovão.

DILI (TATOLI)-Klima Timor-Leste ne’ebé mak manas utilizasaun osan di’ak liu mak moeda sentavu Timor-Leste nia, bele uza ba tinan naruk duke osan tahan dolar amerikanu.

Vise Governadora, Banku Sentrál Timor-Leste (BSTL), Sara Brites informa razaun introdús tan moeda ida ho denominasaun aas liu sentavu 100 mak sentavu 200 tanba nota sira ho denominasaun ki’ik hanesan  dólar amerikanu lima aat lalais tanba klima ne’ebé manas no úmidu nomós utiliza ho intensiva, nota sira ne’e fo’er  no nakles lalais, no halo komparasaun vida útil entre moeda no nota, moeda sentavu sira iha vida útil longu prazu duké osan tahan.

Sara fó ezemplu katak osan tahan hanesan dólar lima serve de’it ba tinan ida ka rua nomós osan tahan ladún ijiene no bele fó impaktu ba saúde tanba fo’er no difisil atu hamoos.

“Ho introdusaun 200 Centavos iha ita-nia família moeda ho valór parsiál ekivalente 2 dólares americano, Banku Sentrál iha planu atu retira gradualmente cinco dólar husi sirkulasaun nune’e bele redús signifikamente kustu sira ne’ebé tinan-tinan Banku Sentrál gasta hodi substitui osan tahan sira hanesan cinco no dez dólares americano iha sirkulasaun,” Sara hato’o iha diskursu iha lansamentu osan sentavu 200 iha edifísiu BSTL, ohin.

Planu BSTL nian konkretiza duni, hahú iha tinan 2016 liuhusi faze lubuk ida ne’ebé envolve servisu intensivu hanesan ekipa operasaun moeda ho apoiu husi uma moeda hala’o uluk peskiza ida ba moeda metálika iha país viziñu sira atu garante espesifikasaun moeda foun sei laduplika fali moeda nasaun viziñu sira-nian ou pelu kontráriu poténsia ka risku ba kontra frasaun  moeda.

“Ekipa prepara dezeña no espesifikasaun hodi aprezenta ba konsellu administrasaun, diskute no aprova dezeñu ne’ebé preferénsia no espesifikasaun 200 centavos tuir rekomedasaun iha proposta. Hafoin hetan tiha aprovasaun ekipa operasaun moeda hahú komunika ba casa moeda tuir akordu ne’ebé estabelese hodi hahú prepara kuñajen ne’ebé obviamente lori tempu fulan neen atu kompleta prosesu  kuñajen no transporta mai to’o iha Dili.”

Tuir rekezitu legál BSTL nian atu halo uluk sosializasaun ba komunidade atubele iha konfiansa no simu osan sentavu foun hodi halo tranzasaun loroloron. Rezultadu husi divulga informasaun ne’ebé perkorre munisípiu hotu hatudu rezultadu ne’ebé di’ak.

Governadór BSTL, Abraão de Vascoselos hatete ho mosu osan sentavu 200, gradulamente hamenus importasaun ba osan dólar lima no sanulu no tuir análiza laboratóriu husi kompañia husi Austrália ne’ebé prodús sentavu 200 ne’e katak sentavu 200  bele dura to’o tinan 30.

“Ba Banku Sentrál hanesan instituisaun, ida ne’e poupansa boot tebes tanba durante períodu ida ne’e laiha kustu adisionál para atu jere kustu adisionál osan iha sirkulasaun.”

(Jornalista : Maria Auxiliadora)

(Editór : Manuel Pinto)

HUSIK IDA HATÁN