DILI (TATOLI)—Ministru Estadu no Ministru Agrikultura no Peska, Estanislau Aleixo da Silva, fó sai katak Tiger Shark ne’ebé foin lalais ne’e mala‘e sira ka’er iha tasi Timor la’ós Tubaraun ne’ebé protejida.
“Agora Tubaraun ida publika ne’e la’ós Tubaraun protejida ida, ida malae ko’us ne’e la’ós protejida, ne’e bolu Tiger Shark, ne’e la tama iha ita-nia lista Tubaraun protejida,” Estanislau da Silva informa ba Jornalista sira iha Palásiu Nobre, Lahane, ohin.
Nia hatutan, Ita iha ró 15 mak kaer Tubaraun no iha ró tolu, Best Seafood ne’e la kaer Tubaraun, ne’e kaer ikan seluk. Iha tempu besik sei iha ema balun ne’ebé hakarak hatama lisensa kaer atún de’it.
“Ami Ministériu Agrikultura buka hatene loloos perfíl kompañia nian basa Ita-nia lei ne’e klaru no di’ak tebes,” Estanislau dehan tuir.
Hatán ba prosesu investigasaun ba peska ikan Tubaraun ne’ebé halo husi kompañia Hong Long husi Xina, Ministru Estadu no Ministru Agrikultura no Peska, Estanislau Aleixo da Silva hatete, nia parte seidauk simu relatóriu husi polísia investigasaun. Nune’e mós diresaun Jerál Peska, MAP, seidauk hato’o mós relatóriu finál ba ministru nune’e seidauk bele fó sansaun ruma.
“Ha’u labele fó sansaun arbiru, hanesan ministru ha’u hola desizaun tuir regra. Tanba ema tau iha facebook, notísia de’it hola sansaun ne’e labele, tenke tuir prosedimentu, polísia investigasaun halo tiha ona, haree tiha ona, hato’o ba prokuradoria jerál parese iha Baukau, sira halo investigasaun, prontu haree tuir prosedimentu ne’ebé iha”, Estanislau esplika.
Nia dehan, MAP fó lisensiamentu peska ba ró 15 ba Hong Long durante tinan ida no antes bá peska halo uluk inspesaun, haree sertifikadu legalidade no haruka perfíl kompañia ba Indonézia, Austrália, Papua Nova Giné, nune’e husi Austrália fó resposta hodi halo inspesaun ba ró sira ne’e antes halo atividade peska, nune’e ró sira ne’e halo peska legalmente.
Antes ne’e MAP duni sai ró rua husi Sri Lanka ne’ebé kaer Tubaraun protejida, bainhira investigasaun ne’ebé hala’o ba Hong Long viola lei, sei lori ba prezente informa iha Konsellu Ministru para depois halo investigasaun.
(Jornalista : Maria Auxiliadora)
(Editór : Manuel Pinto)
