Tékniku MAP Avalia Hela Proposta Husi Kompañia

0
155

DILI, (TATOLI) – Tékniku Diresaun Jerál Peska, Ministériu Agrikultura no Peska (MAP) daudaun ne’e haree no avalia hela proposta husi kompañia ne’ebé hakarak halo investimentu iha peska. Proposta kona-ba investimentu peska ne’e mai husi nasaun Indonézia, Maroko no Xina ne’ebé mak halo parseria ho timoroan.

Ministru Estadu no Ministru Agrikultura no Peska, Estanislau Aleixo da Silva hatete proposta sira ne’e tékniku sira depois fó pareser no sei avalia hafoin kontaktu ho kompañia sira para haree saida mak sira hakarak hahú halo.

“Balun hakarak haki’ak ikan iha tasi-laran, balun hakarak halo peska, tantu ida ne’e proposta balun iha Diresaun Jerál Peska. Ha’u la hola desizaun arbiru, proposta tama entrega ba diresaun tékniku sira mak halo avaliasaun, halo rekomendasaun para depois bele fó lisensiamentu”, Estanislau hatete iha Palásiu Nobre Lahane, ohin.

Estanislau hatutan iha lei hatete, antes fó lisensa ba kompañia tenke haree uluk perfíl kompañia nian ne’ebé sai hanesan kondisaun fundamentál.

“Sei lafó lisensa ba kompañia ida sein haree nia perfíl maibé la’ós Timór de’it mak haree. Ami haruka perfíl kompañia ba Indonézia, Austrália no Papua Nova Giné tanba ita-nia tasi ne’e ho Indonésia, Austrália, Papua Nova Giné depois fó sira-nia opiniaun mai, kompañia ne’e la envolve atividade ilegál ruma ka la’e?”.

Bainhira kompañia envolve atividade ilegál, imediatamente lisensa laiha tanba ida ne’e kondisaun fundamentál ona. Sobre kompañia balun ne’ebé hatama proposta kleur ona, bainhira proposta di’ak hetan lisensa no ladi’ak sei lahetan.

Diretór Jerál Peska, Acácio Guterres hatete sobre proposta kompañia nian husi nasaun tolu ne’e, tékniku halo hela pareser ba ministru no ministru mak foti desizaun tanba tuir lei ministru mak tenke fó autorizasaun.

Proposta kompañia husi Maroko no Indonézia mai kleur tiha ona no ministru haruka ona despaxu ba diresaun atu orienta kompañia hatama dokumentu ró nian.

“Mas to’o ohin loron ami seidauk simu dokumentu ró husi parte rua ne’e, sira seidauk aprezenta no ami hein hela. Agora ida ikus (husi Xina) foin mak hatama proposta de’it, ami seidauk halo pareser tékniku”.

Jornalista: Maria Auxiliadora

Editora: Rita Almeida

HUSIK IDA HATÁN