iklan

NASIONÁL, DILI

Tan Povu, Alkatiri ‘Viola’ Juramentu 2006

Tan Povu, Alkatiri ‘Viola’ Juramentu 2006

DILI (TATOLI) –Tinan sanulu resin ida liu ba, nu’udar Primeiru Ministru iha governasaun Fretilín, Mari Alkatiri, jura katak, sei la mai tan iha Palásiu Governu. Maibé realidade 2017 la hanesan ona uluk, Povu kahe hikas fiar hodi asume kargu xefe do governu, obrigadu, Alkatiri dada (viola) promesa be nia halo tiha ona iha 2006.

“Ha’u sai hosi Palásiu Governu ho juramentu katak, ha’u sei la mai tan iha ne’e. Promesa ne’e ha’u halo liu tinan 11, maibé povu bolu fali, entaun ha’u hakarak dada fila fali ha’u nia juramentu,” Primeiru Ministru Sétimu Governu Mari Alkatiri realsa iha serimónia ritual dada juramentu iha Palásiu Governu, horisehik loro kraik.

Nia dehan, sente kontente basa lia nain sira halo tuir ona promesa be nia ibun temi ona iha tinan 2006, Tan mak fó fiar iha períodu ne’e, obrigadu fila mai Palásiu Governu.

“Sente todan tebes katak ha’u sai hosi ne’e ho tinan 50 resin ho fuuk ladauk mutin, maibé ha’u fila fali mai ho idade aumenta no fuuk mós mutin los ona,” Alkatiri espresa nia sentimentu.

Lia fukun, kuku nain hosi munisípiu sira mai hakotu ona, ohin ba oin, Alkatiri mós hakarak husu ba tékniku sira atu hadi’a obra balun be at daudaun antes que nia (Alkatiri) haknaar an ba.

“Presiza hadi’a obra balun hafoin ha’u mai tanba ha’u mai servisu lakohi atu rona fali martelu nia lian no haruka lori fali martelu mai,” Mari Alkatiri afirma.

Hodi promete “Aban (ohin) ha’u sei liuhosi ne’e atu haree saida mak atu hadi’a, tenke hadi’a hafoin ha’u tama servisu tanba ha’u lakohi rona distúrbiu.”

Iha fatin hanesan reprezentante lia Nain hosi Munisípiu Lautem, Manuel Xisto informa, dalan moos ona ba Primeiru Ministru (PM), Mari Alkatiri atu bele mai servisu iha Palásiu Governu.

Nia dehan, “Rezultadu asaun rituál bele loke ona dalan, dalan luan ona tanba ami haree liuhosi manu aten ne’ebé fó serteza ba Primeiru Ministru (PM), Mari Alkatiri hodi bele tama servisu iha Palásiu Governu inklui funsionáriu sira ne’ebé durante ne’e hala’o hela sira nia kna’ar iha Palásiu Nobre Lahane,” Manuel Xinto ba jornalista sira iha Palásiu Governu hafoin serimónia rituál.

(Jornalista : Zezito Silva).

(Editór : Manuel Pinto)

iklan
iklan

Leave a Reply

iklan
error: Content is protected !!