Tan Pasiénsia, Ativista Nakfila sai Prezidente Klubu

0
166
Prezidente FC. Aimo, Miguel da Silva ho nia jogadór sira balun iha kampu futebol, Estádiu Munisipál, Díli. Foto: FC Aimo

DILI, (TATOLI) – Hakarak moris independénte, pasiénsia, nakloke aan ba ema hotu, espíritu voluntáriu boot no konsiénsia ne’ebé aas nomós hakarak aprende barak husi ema hotu-hotu no onestu hodi to’o hetan susesu.

Miguel da Silva Ornai

Ne’e mak prinsípiu moris, Miguel da Silva Ornai ho naran ne’ebé familiár, bolu husi inan-aman no kolega sira katak Migy ba ajénsia Tatoli, ohin iha Palásiu Governu.

“FC Aimo, agora ha’u mak sai prezidente klubu”, informa fuan domin husi José de Jesus Ornai no Domingas Alves husi munisípiu Maun-Fahe, postu administrativu Fatuberliu ne’e.

Kargu voluntáriu ne’ebé asume liuhusi desizaun Kongresu Munisipál, klubu futebol FC Aimo, Munisípiu Maun-fahe husi fundadór, membru no voluntáriu klubu foinsa’e ne’e nian. FC Aimo inísia husi nia rasik nomós nia belun Same-oan ida, Bartolomeu Maia.

FC Aimot (Ailot ho modo-mahu Futebol Clube) ne’e katak Ailot (foho ida iha fatuberliu ne’ebé nakonu ho kafé mak iha laran) no Modo mahut (bee kolam ida ne’ebé nakonu ho ikan, boek, tuna ho lafaek).

Migy hanesan poeta ida ne’e mós esplika, to’o iha faze ida ne’e la’ós mosu nu’udar mehi ka teki-teki ema entrega de’it nu’udar prémiu ida maibé liuhusi tempu ne’ebé naruk, situasaun moris ne’ebé la fásil. Ezije pasiénsia no kalma hodi bele atinji objetivu ida ne’e.

“Situasaun no kondisaun familia nian ne’ebé ho simples. Apa ho ama ne’ebé uluk ema halo aat no sai atan, ha’u hakarak la’o tuir eroi sira-nia ain fatin. Ha’u hakarak sai ema ne’ebé diferente ho ema seluk no úniku. Ha’u hakarak sai ezemplár iha familia” haktuir Migy ne’ebé moris iha Fatuberliu, loron 10 fulan setembru tinan 1989 ne’e.

Ho inspirasaun ho kondisaun família, nu’udar foho-oan, inan-aman moris ho vida agrikultura, tuir nia, halo nia la rende ba dezafiu maibé kontinua hakaas hodi aprende no estuda.

“Ha’u eskola primária iha eskola Rainha Da Paz Weberek (1997-2003), Pré-sekundária iha Eskola Ratu Damai Weberek (2004-2006), sekundáriu iha Eskola Francisco Borja Da Costa (2007-2009) no universidade iha UNTL (Universidade Nasionál Timor Lorosa’e) (2009-2016)”, informa lisensiadu departamentu polítika públika, Fakuldade Siénsia Sosiál (FSS), UNTL ne’e.

Mane-klosan isin lotuk ain-aas ho zodiaku Virgo ne’e haktuir, hahú nia estudu iha universidade ramata esperiénsia moruk no midar nia hasoru hotu liliu bainhira iha universidade hanesan finanseira araska.

Osan dala ruma araska atu hola hena ba hatais, hola hahan di’ak ruma ba han iha família uma laran nian. Maske nune’e hakbiit vontade hodi esforsu maka’as liutan.

“Osan atu selu eskola dala ruma la iha, iha universidade ka Dili dala ruma osan selu bemo la iha, atu han etu bikan ida iha loron ida mós araska. Osan atu print no fotokopia matéria mós dala ruma araska”, haktuir oan daruak husi maun-alin, feton-naan na’in walu, mane na’in lima, feto na’in tolu ne’e.

Realidade moris ne’ebé la perfeitu, buka luta nafatin liberta moris liuhusi dalan pozitivu sira alende liuhusi edukasaun formál, buka aprende mós ho ema seluk no liuhusi organizasaun sosiál no akadémika sira.

Aprende iha Front Mahasiswa Timor Lorosa’e (FMTL), Movimentu Estudante no Joventude 1912,Maun-fahe, Klibur Estudante Fatuberliu, Front Trabalhador Maubere, Front Arte no Kultura, Klubu FC.Aimo, Grupu Poeta Foinsa’e Timor, CNJTL (Conselho Nacional Juventude Timor-Leste) no seluk tan hodi aumenta esperiénsia no koñesimentu nomós kompleta tan siénsia sira ne’ebé aprende iha prosesu aprendijazen.

“Kompleta tan 25% ne’ebé dosente fó hodi mentaliza, kapasita no kaderniza ha’u nian aan para sai lider ne’ebé di’ak. Aprende halo karta saida de’it, por exemplo halo proposta ruma”, esplika ativista no alumni UNTL ne’e.

Ativista ne’ebé agora dedika aan hodi lidera klubu desportiva ho naran FC. Aimo ne’e fó hanoin ba foinsa’e no estudante sira ne’ebé sei aprende no estuda liliu iha ensinu superiór sira katak sai universitáriu alende estuda tenke buka sai ajente kontrolu sosiál, hatudu espíritu voluntarizmu, halo dedikasaun no hatudu domin ba povu no nasaun.

“Ita tenke sai mahasiswa ne’ebé iha kontrolu sosiál, halo dedikasaun ne’ebé boot, hadomi povo no ita-nia rain. Sai husi knua mai aprende no fila hikas ba knua atu pratika ou realiza”, Fatuberliu, Same-oan ne’ebé nia figura rezisténsia preferida mak Saudozu Francisco Borja da Costa ne’e fó hanoin.

Tuir Migy, razaun nia eskolla saudozu Francisco Borja da Costa ne’e tanba saudozu nu’udar poeta na’in ida, iha kreatividade barak, sanidór puízia, halo imazinasaun ba buat ne’ebé mak úniku, ativista radikál no revolusioner ida.

“Povo Maubere la sai tan atan ba ema ida, dalan le’ut be ó husik hela nomós minutu ida hakmatek nu’udar obra autór ne’e nian ne’ebé ha’u gosta tebes”, relata jerasaun uma lisan Orhui (inan nian) nomós uma lisan Babulu (aman nian).

 Jornalista: Rafy Belo

Editora: Rita Almeida

HUSIK IDA HATÁN