Tan Kolen Lere Lakohi Iha ‘Eleisaun Antisipada’

0
2977
Majór Jenerál FALINTIL-Forsa Defeza Timor-Leste (F-FDTL), Lere Anan Timur dadalia ho jornalista sira hafoin sorumutu ho Prezidente Repúblika iha Palásiu Prezidente Nicolau Lobato, ohin. Foto Tatoli/Xisto Freitas

DILI (TATOLI)—Majór Jenerál FALINTIL-Forsa Defeza Timor-Leste (F-FDTL), Lere Anan Timur hateten nia lakohi partisipa iha votasaun bainhira mosu eleisaun ruma iha dalan klaran alias eleisaun antisipada tanba kolen ona.

“Ha´u hanoin katak povu baruk ona ba vota bainhira mosu fali eleisaun antisipada. Ha´u rasik mós lakohi atu ba vota. Vota ne´e dala ida iha tinan lima,” Lere hato´o kestaun ne´e ba jornalista sira iha Palásiu Prezidente Nicolau Lobato, Bairru-Pité, Dili, hafoin husu ninia komentáriu kona-ba  governu foun iha ameasadu nia laran tanba partidu koligasaun balun (KHUNTO) dada an hosi koligasaun, ne´ebé iha poténsia bele akontese eleisaun antisipada.

Eis lider rezisténsia ne´e husu ba lider partidu polítiku hotu-hotu katak koligasaun la´ós atu hadau malu kadeira maibé atu serbí nasaun.

“Ha´u husu ba timoroan sira no husu ba lider hotu-hotu, ita koliga la´ós atu hadau malu kadeira. Ita koliga atu ukun hodi serbí ita nian rain. Ita labele aproveita situasaun hodi buka fatin di´ak ba ema ida-idak. Ne´e maka uluk ami iha ai laran dehan katak labele aproveita funu maibé ita tenke serbí funu no nasaun. Agora mós hanesan ne´e. Kuandu ita manán, ita serbí Estadu, la´ós  Estadu maka serbí fali ita,” Lere realsa.

Iha partidu Congresso Nacional da Reconstrução de Timor (CNRT), nia haktuir, imposivel Prezidente Partidu CNRT Xanana Gusmão hakarak destroi fali ninia Estadu. Iha Partidu Libertasaun Popular (PLP), Lere tenik, imposivel Prezidente PLP, Taur Matan Ruak hakarak ninia Nasaun ne´e sai at.

“Sira ne´ebé buka kadeira ne´e, di´ak liu lalika fó tan kadeira,” Jenerál Fitun rua ne´e realsa.

Iha soru mutuk Major-Jenerál F-FDTL ho Prezidente Repúblika Lú Olo informa situasaun Forsa Armada ba Prezidente-da-Repúblika

Alende ne’e, ko’alia mós kona-ba mandatu Major-Jenerál Lere nian, ne’ebé tuir lei, sei termina iha fulan-Outubru.

Ba mandatu ne’ebé besik termina ona, Lere Anan Timur, hatete, sei halo tuir desizaun polítiku sira. Hanesan timoroan nia deklara prontu atu asume responsabilidade hodi kontinua nia knaar, bainhira hetan fiar husi polítiku sira.

(Jornalista: Xisto Freitas)

(Editór : Manuel Pinto)

 

HUSIK IDA HATÁN