Sub-Setór Agrikultura Presiza Hetan Atensaun

0
60
Peskizadór no dosente UNTL, Lúcio Marçal Gomes. Foto/Egas Cristovão.

DILI, (TATOLI) – Governu Konstitusionál Dahituk tenke tau atensaun ba setór agrikultura tanba nia sai hanesan baze ekonomia no kuaze populasaun Timor-Leste porsentu 80 moris dependente ba agrikultura.

Peskizadór no dosente Universidade Nasionál Timor Lorosa’e (UNTL), Fakuldade Agrikultura, Lúcio Marçal Gomes hatete VII Governu Konstitusionál tenke tau atensaun boot ba agrikultura tanba iha setór ne’e iha sub-setór lima ne’ebé mak importante.

“Primeiru mak ita ko’alia kona-ba sub-setór planta industriál, ne’e ita ko’alia kafé, planta industriál seluk iha maibé planta industriál ne’ebé tau ona nia produtu ba merkadu mundiál mak kafé”, Lúcio hatete iha Kampus Sentrál UNTL, ohin.

Sub-setór seluk mak seguransa alimentár no durante tinan 15 Timor-Leste halo importasaun maibé tuir loloos rai ne’e iha poténsia atubele halo produsaun hare, batar no buat sira seluk ne’ebé bele fó seguransa alimentár ba populasaun.

“Mas durante ne’e como ita osan barak entaun ita hasai osan para bá sosa foos depois fó ita-nia dólar ne’e ba nasaun sira seluk depois ita-nia rai ne’e ita lautiliza ho didi’ak maski Governu halo ona irrigasaun iha fatin balun maibé seidauk utiliza ho másimu”.

Aleinde ne’e iha setór ida tan mak pekuária no haree katak Timór mós han na’an barak maibé seidauk tau atensaun didi’ak ba na’an tanba ne’e mak nia kualidade menus no na’an husi liur importa mai hanesan manu, bibi, karau husi Brazíl, Portugál, Austrália no seluk tan.

“Tuir loloos ita bele prodús iha ita-nia rai-laran mas como ita seidauk haree setór agrikultura ne’e didi’ak ne’ebé ita di’ak liu importa. Ida ne’e sai hanesan dezafiu boot ida mai ita”.

Nune’e mós sub-setór peska nian, Timór iha nian tasi ne’ebé nia ikan barak tebes mas Governu seidauk tau-matan didi’ak nune’e presiza dezenvolve setór sira ne’e. Sub-setór ikus liu mak Timor-Leste poténsia ba ortikultura hanesan modo tahan no ai-fuan sira.

“Ita seidauk dezenvolve didi’ak entaun sira ne’e hotu halo importasaun entaun ita-nia osan sira ne’ebé mak ita halo dezenvolvimentu ne’e, ita hasai hotu sosa fali ba produtu sira ne’ebé mak ita hakarak konsumu seidauk tau atensaun didi’ak”.

Tuir retratu mandatu Governu Konstitusionál Daneen nian iha setór ekonómiku nia mak estabelese agrikultura iha área irrigasaun Oebaba, Raibere, Karau Ulun, Kasa no Bonuk iha munisípiu Ainaru, Kovalima no Manufahi ne’ebé ho nia luan ho totál ektare 960 hodi benefisia agrikultór na’in 1.020 no konta to’o remata 2017, bele hetan ektare liu 4.530 hodi benefisia agrikultór liu na’in 3.170.

Reabilita ona kafé ektare 350 iha Ermera no ektare 150 iha Likisá. “Ita haluan ektare 50 plantasaun kafé nian iha Aileu, Ermera, Ainaru no Manufahi no diversifika ona ektare 100 ba plantasaun kafé iha Ermera. Produsaun totál kafé, to’o remata tinan 2017, hamutuk besik tonelada 50.687”, refere mandatu ne’e.

Aleinde ne’e implementa programa sintura ortíkola tinan-tinan iha munisípiu Aileu, Ainaru, Baukau, Bobonaru, Dili, Ermera, Likisá, no Manufahi ne’ebé nia luan hanesan área ida ho totál ektare 107 ba kuda fore, mode, tahan no ai-fuan hodi envolve agrikultór na’in 1.620.

Jornalista: Maria Auxiliadora

Editora: Rita Almeida

HUSIK IDA HATÁN