DILI, (TATOLI) – Serimonia kultura hosi lia-nain sira hosi munisípiu 12 inklui rejiaun autónomo espesiál Ambeno Oe-Cusse, atu loke fali odamatan Palásiu Governu ba Primeiru Ministru, Marí Alkatiri sei akontese semana oin.
“Ministériu Administrasaun Estatál maka organiza tanba ne’e sei hala’o iha tersa ou kuarta (semana oin)ʺ, hatete Xefe Governu, Marí Alkatiri ba jornalista sira iha Palásiu Prezidensiál Nicolau Lobato, Bairo-Pite, ohin.
Nia informa, Ministériu Administrasaun Estatál oras ne’e kontakta autoridade munisípiu hodi organiza lian-nain sira hodi apoiu programa ne’e.
Serimonia ne’e hanesan parte ida atu dada hikas lia-fuan ou juramentu ne’ebé halo iha 2006 hodi jura sei la túr tan iha Palásiu Governu nu’udar Primeiru Ministru.
Oras ne’e, nia hala’o kna’ar iha Palásiu Nobre Lahane Dili.
Jornalista: Agapito dos Santos
Editora: Rita Almeida
