Semana Oin Pose Membru Governu Faze Daruak

0
484
Primeiru Ministru, Dr. Marí Alkatiri entrega lista membru Governu ne'ebé atu simu pose faze daruak nian ba Prezidente Repúblika, Dr. Francisco Guterres Lú Olo, ohin dader iha Palásiu Prezidente Nicolau Lobato. Imajen Mídia Palásiu PR.

DILI (TATOLI)—Prezidente da Repúblika, Francisco Guterres Lú Olo anunsia ona loron tomada pose estrutura sétimu governu faze daruak nian sei monu iha loron, Tersa, 3 (semana oin), fulan Outubru.

Primeiru Ministru, Dr. Marí Alkatiri hateten membru governu hamutuk ema na’in 15 maka sei simu pose.

“Lista membru Governu ne’e ohin ha’u entrega ona ba Prezidente Repúblika. Prezidente Repúblika anunsia data tomada pose iha 3 Outubru,” Marí hato’o informasaun ne’e ba jornalista sira iha Palásiu Prezidente Nicolau Lobato, Bairru-Pité, Dili, kinta ne’e, hafoin aprezenta lista membru Governu ba Xefe Estadu Dr. Francisco Guterres Lú Olo.

Nia esplika membru Governu seidauk kompletu no presiza halo tan negosiasaun ho ema independente no sira ne’ebé iha partidu atu bele hola parte iha governu.

“Ha’u hanoin kuandu ita halo polítika no lori ba kampaña, dehan atu hakuak ema hotu-hotu tanba ne’e ita labele halai sees hosi ita nia polítika ne’e. Ida ne’e duni maka povu hakarak,” nia esklarese.

Marí haklaken membru governu ne’ebé atu simu pose kompostu hosi FRETILIN, PD, independente no indivíduu hosi partidu CNRT no PLP.

Nia informa katak kontaktu entre nia ho líder sira hosi partidu CNRT durante ne’e la’o di’ak no mós Prezidente PLP, Taur Matan Ruak. Tanba ne’e, tuir Marí, laiha problema kona-ba formasaun governu ne’e.

Hafoin tomada pose faze daruak, sei iha tan faze datoluk nian no totál membru Sétimu Governu Konstitusionál hamutuk ema na’in 32.

(Jornalista: Xisto Freitas)

(Editór : Manuel Pinto)

HUSIK IDA HATÁN