Reitór UNTL: Livru Tour de Timor Ne’e Reflesaun

0
41
Reitór UNTL Francisco Miguel Martins, durante nia intervensaun iha lansamentu livru Tour de Timor. Foto: Media UNTL

DILI, (TATOLI) – Reitór Universidade Nasionál Timor Lorosa’e (UNTL), Francisco Miguel Martins konsidera livru Tour de Timor: Istória Aventura Ida, ho autora amerikana ida, ne’ebé mós hanorin iha departamentu inglés, UNTL ne’e nu’udar reflesaun ida.

Autora ba livru ne’e mak Jonnie Andruss no uza Timor-Leste nia eventu internasionál anuál, korida bisikleta no sa’e foho hanesan meius ida hodi promove, hanorin no aprende lian inglés iha eskola sira.

“Livru ne’e nu’udar reflesaun ida husi realidade ida ne’ebé mak nia akompaña”, hatutan reitór UNTL hafoin lansamentu livru ne’e husi embaixadora Amérika ba Timor-Leste, Karon Stanton hamutuk ho fundadór Tour de Timor, José Ramos Horta nomós autora rasik, iha Uma Amérika ne’ebé lokaliza iha Kampus Resende UNTL, ohin.

Nia informa, livru ne’e sei fahe mós ba profesór sira ne’ebé hanorin lian inglés. “Ita haree husi nia demonstrasaun oinsá lee livru ne’e kapas tebes, motiva ema atu estuda liutan inglés ho di’ak”, hateten reitór UNTL ne’e hodi haktuir demonstrasaun ne’ebé mak autora no voluntáriu Uma Amérika sira lee hodi dramatiza tuir konteúdu husi livru ne’e.

Fundadór Tour de Timor, José Ramos Horta hateten, livru ne’ebé lansa kontribuisaun di’ak liliu mós ba labarik sira hodi aprende liutan inglés no halo publisidade ba atividade Tour de Timor.

“Portantu ho istória ne’e, istória ba sira ne’ebé aprende lian inglés ba labarik sira maibé mós ema komesa hatene barak liutan Tour de Timor”, akresenta.

Fundadór Ramos Horta espera katak livru ne’ebé bele asesu mós liuhusi online ne’e bele publika liutan no fahe ba eskola sira. “Eskola ita nian, eskola sira iha Timor-Leste tomak”, nia hein.

Atividade Tour de Timor, promove husi Eis-Prezidente Repúblika José Manuel Ramos Horta, dezde fulan augustu 2009 ho objetivu hametin pás no atrai turista internasionál sira.

Entretantu iha lansamentu livru Tour de Timor: Istória Aventura Ida, livru ne’ebé hakerek husi autora amérikana, profesora konvidada ida iha UNTL ne’e, hetan partisipasaun husi dirijente no dosente UNTL sira inklui estudante sira.

Jornalista: Rafy Belo

Editora: Rita Almeida

HUSIK IDA HATÁN