Reitór UNTL : Formasaun Lideransa Importante

0
91
Reitór Universidade Nacional Timor Lorosa’e (UNTL), Francisco Miguel Martins. Foto: Media UNTL

DILI, (TATOLI)-Reitór Universidade Nacional Timor Lorosa’e (UNTL), Francisco Miguel Martins hateten, formasaun lideransa importante hodi prepara estudante sira ba futuru lideransa Timor-Leste nian tanba ne’e nia sente orgullu ho Gabinete Pro-reitoria Asuntu Estudantíl nian hodi inisia formasaun ne’e.

“Asuntu estudantíl, fó importánsia maka’as atu eleva kapasidade estudante sira nian liuhusi treinamentu liuliu faze ida ne’e maka formasaun lideransa no kursu lian Koreia nian,” reitór UNTL hateten, iha nia intervensaun, iha eventu fahe sertifikadu lideransa no lian no kultura Korea, iha salaun FEAU (Fakuldade Edukasaun, Arte no Umanidade), horisehik.

Pro-reitór Asuntu Estudantíl, Zeferino Viegas Tilman informa katak sertifikadu ne’e fahe de’it ba estudante sira ne’ebé partisipa to’o remata kursu lideransa no lian no kultura Korea nian.

Kursu ne’e rasik fasilita husi profesór koreanu, Chon Wan Choi ho programa lideransa hanesan faktu globál, dalan ba vizaun, esénsia nia imajen, problema, identidade komunikasaun no realizasaun inklui tópiku relevante seluk kona-ba lideransa nian nomós lian koreanu nian.

Formada ida ne’ebé konsege partisipa formasaun ne’e to’o remata, Ana Maria das Neves Soares husi Fakuldade Medisina no Siénsia Saúde (FMSS) agradese ba oportunidade  tan konsege termina formasaun ne’e to’o hotu.

“Bainhira iha hakarak atu aprende buat foun ruma dalan ba ita sempre iha,” estudante departamentu Parteira ne’e akresenta hodi fó motivasaun.

Entretantu formasaun ne’e la’o hahú iha tinan letivu 2016-2017 iha Sentru Estudu Koreanu (SEK) nian, iha UNTL no estudante barak sai ona benefisiáriu ba formasaun ne’ebé sentru ne’e oferese.

(Jornalista: Rafy Belo)

(Editór : Manuel Pinto)

 

 

HUSIK IDA HATÁN