Reforma Alfándega Presiza Atensaun Governu Dahituk Nian

0
140
Diretór Jerál Alfándega, Minstériu Finansa, José António Fátima Abílio. Foto/Egas Cristovão.

DILI (TATOLI)- Diretór Jerál Alfándega, José António Fátima Abílio, bolu atensaun ba governu konstitusionál dahituk atu kontinua tau atensaun ba polítika reforma Alfándega ne’ebé hahú ona hosi Governu daneen, basa polítika refere seidauk konklui.

“Halo reforma ba iha sistema husi Asycuda ++ ba Asycuda World, husi preparativus no formasaun sira la’o hotu ona maibé ita tama iha implementasaun seidauk abranje bá fatin hotu hanesan iha fronteira sira ne’e tenke uza ona sistema Asycuda World ne’e para fasilita, ida ne’e mak ita husu para iha kontinuasaun,”, José António Fátima Abílio, hatete iha edifísiu Ministériu Finansa tuan, ohin.

Aleinde ne’e iha mós reforma ba rekursu tanba hafoin haree kualifikasaun iha rekursu ezistente iha Alfándega ho limitasaun ne’ebé iha no labele kobre hotu área sira ne’e, entaun husi parte rekursu nian bele iha tan rekrutamentu nó mós oinsá hadi’a rekursu sira hodi halo tan kapasitasaun para hasa’e koñesimentu.

Seluk mak kona-bá infraestrutura, hakarak fó prestasaun servisu ida di’ak ba públiku, hakarak atu fasilita komérsiu ho di’ak, halo kontrolu ida di’ak, infraestrutura tenke suporta tantu kona-bá edifísiu, ekipamentu para bele ajuda funsionáriu sira halo kontrolu ida ne’ebé efetivu ba merkadoria sira ne’ebé mak tama.

Kona-bá utilizasaun sistema Asycuda World, foin uza iha fronteira Batugadé, halo tiha ona lansamentu no uza ona, falta Sálele tanba ekipa IT foin bá halo ajustamentu no iha planu Outubru mak bele funsiona sistema ida ne’e.

“Sistema ne’e fasil atu asesu no klaru ami monta ne’e iha fatin hotu tantu Baukau, Suai, Batugadé. Sistema ne’e sei funsiona hotu. Agora ita só haree nia faze atu uza  ne’e tanba hanesan iha Baukau nia importasaun no esportasaun mínimu liu, dala ruma sira mai husi Liran nian, Alor mak mai fa’an sasán iha ne’ebá mas nia importasaun ida ne’ebé mak ho volume ki’ik,” Diretór jerál ne’e relata.

Relasiona ho prestasaun servisu parte Alfándega mós halo apreensaun barak ba sasán importasaun bainhira hatama mai lá deklara hotu no Alfándega halo auto apreensaun no auto notísia depois fó notifikasaun ba na’in kompañia nian hodi complain bainhira lá halo maka sasán sira ne’e tau afavór ba Estadu.

“Agora sasán sira ne’e ami sei rai hela iha armazein portu nian, hein halo fali desizaun para halo leilaun. Sasán ami prende hanesan fiu, tua, televizaun, sasán nesesidade bázika ne’ebé mak sira importa ladeklara hotu.”

(Jornalista : Maria Auxiliadora)

(Editór : Manuel Pinto)

 

HUSIK IDA HATÁN