Ramos Horta La Asume Ministériu Ketak

0
388
Enkontru Ministru Estadu no Ministru Konselleiru Seguransa Nasionál, José Ramos Horta ho Xefe Estadu Lú Olo. Imajen Mídia Palásiu PR.

DILI, (TATOLI) – Ministru Estadu no Konselleru ba Seguransa Nasionál, José Ramos Horta hateten nia asume kna’ar todan tolu maibé la’ós ministériu ketak, serbisu ho Primeiru Minisitru nia gabinete hodi haree setór seguransa nasionál.

Seguransa nasionál, nia esplika, tau-matan ba defeza, seguransa no polítika externa hodi fó konsellu ba Primeiru Ministru. Serbisu ne’e seidauk monta tanba mekanizmu foun ida ne’ebé sei estuda oinsá maka instituisaun bele la’o didi’ak.

“Ha’u sei haree ajenda governu nian oinsá Primeiru Ministru fó diretiva ba ha’u atu halo serbisu ida ne’e”, Horta ko’alia ba jornalista sira iha Palásiu Prezidente Nicolau Lobato, Bairu-Pité, segunda ohin.

Horta informa planu prioridade ba nia maka monta no harii instituisaun Konsellu Seguransa Nasionál hodi haree kona-ba seguransa nasionál nia ameasa mai hosi ne’ebé, ameasa hosi liur ka rai laran, konvensionál hanesan krime organizadu, droga, terorizmu ka la’ós ameasa konvensionál.

“Ne´e signifika halo ligasaun direta ho diplomasia. Ne’e duni Konsellu Seguransa Nasionál atu haree estudu, análiza, akompaña situasaun iha rai laran no rai liur para alerta governu ka órgaun Estadu para oinsá ita nia polítika ne’e bele di’ak liu”, haklaken premiadu nobel ba dame.

Tuir nia haree estabilidade nasionál oras ne’e la’o di’ak no ida ne’e prefere tenke hatudu nafatin.

“Rai hanesan ita nian ne’ebé ki’ik no frajíl bele iha ameasa hosi liur hanesan droga, jogu ilegál, prostituisaun forsadu ne’ebé lori feto sira hosi Xina no Tailándia, ida ne’e bele interfere tama iha órgaun Estadu nia laran”, katak.

Jornalista: Xisto Freitas

Editora: Rita Almeida

HUSIK IDA HATÁN