R.Horta Sei Lidera Reuniaun KS

0
452
Eis Prezidenti Repúblika, Dr. José Ramos Horta sorumutu ho Prezidenti Repúblika, Dr. Francisco Guterres Lú-Olo hodi entrega konvite reuniaun kona-ba demokrasia iha Ázia Pasífiku. Imajen Mídia PR.

DILI (TATOLI)—Reuniaun Konsellu Seguransa (KS) iha Nova Yorke ba loron 20 Setembru sei lidera hosi Eis Prezidente da Repúblika José Ramos Horta, tan ne’e ohin, Segunda (04/09) Nia halo enkontru ho Prezidente da Repúblika Francisco Guterres Lú Olo hodi koordena kona-bá mensajen saida mak PR Lú Olo sei hato’o iha reuniaun konsellu seguransa.

Aleinde de Ramos Horta, reuniaun konsellu seguransa sei lidera mós hosi Sekretáriu Jerál ONU, Antonio Guterres no Prezidente Uniaun Afrikana,  Moussa Faki.

José Ramos Horta, Antonio Guterres ho Moussa Faki mak lidera reuniaun nivel alto ida ne’e ho objetivu atu ko’alia  kona-ba relatóriu ne’ebé halo uluk nu’udar Xefe Prezidente Painél Altu Nivel Operasaun Pás nian.

“Ha’u mai hasoru ho Prezidente Repúblika “Lu-Olo” atu buka koordena mensajen saida mak di’ak liu ba Reuniaun Konsellu Seguransa kona-ba operasaun pás iha mundu,” José Ramós Horta ba Jornalista sira hafoin hasoru malu ho Xefe Estadu iha Palásiu Prezidente, Ai tarak Laran, (04/9).

Horta hatutan, Prezidente Repúblika, nia vizita ba Nova Yorke ho objetivu atu responde konvite mai hosi Konsellu Seguransa atu Xefe Estadu bele ko’alia iha sesaun espesiál no ba sesaun normal Asembleia Jerál iha 20 Setembru.

“Ha’u ko’alia  ho Prezidente Repúblika “Lu-Olo” tanba Reuniaun Konsellu Seguransa iha 20 Setembru, iha reuniaun ne’e, ha’u ho Sekretáriu Jerál ONU, Antonio Guterres ho Prezidente Uniaun Afrikana,  Moussa Faki mak lidera diskusaun atu ko’alia  tan kona-ba relatóriu ne’ebé ha’u halo uluk nu’udar Xefe Prezidente Painél Altu Nivél Operasaun Pás nian,” Horta esplika razaun lidera reuniaun konsellu seguransa.

Hodi hatutan katak, Sekretáriu Jerál ONU, Antonio Guterres daudaun ne’e estuda oinsá halo implementasaun ba rekomendasaun hirak iha ami nia relatóriu Painél Altu Nivel ba Operasaun Pás ONU nian.

Entretantu Ramós Horta ho Xefe Estadu, Lu-Olo sei arranka iha 16 Setembru ba Nova Yorke atu partisipa sesaun Konsellu Seguransa nian, enkuantu Konsellu Seguransa konvida Horta atu asiste mós iha Asembleia Jerál maibé sei la marka prezensa tanba só iha nia intervensaun Konsellu Seguransa de’it.

“Kuandu reuniaun hotu ami buka hodi fila lalais, ami iha ne’eba másimu loron lima maibé Prezidente Repúblika, Lu-Olo  ha’u rona fila antes kedan, kuandu sesaun remata iha 20 Setembru, Prezidente sa’e aviaun fila kedan.

(Jornalista : Zezito Silva)

(Editór : Manuel Pinto)

 

HUSIK IDA HATÁN