PTR Hato´o Planu Tribunál Ba Prezidente Repúblika

0
92
Sorumutu entre PTR, Deolindo dos Santos no PR Lú Olo, ohin dader. Imajen Mídia Palásiu PR

DILI (TATOLI)—Prezidente Tribunál Rekursu (PTR), Deolindo dos Santos hala´o enkontru ho Prezidente Repúblika, Dr. Francisco Guterres Lú Olo, ko´alia kona-ba halo oinsa maka Tribunál prepara nia planu ho di´ak hodi hadi´a kondisaun liuhusi orsamentu jerál Estadu 2018.

Kondisaun ne´ebé PTR prefere maka orsamentu formasaun ba juiz no funsionáriu sira, hadi´a edifísiu tribunál sira liu-liu Tribunál Distritál Dili ne´ebé maka laiha ona kondisaun atu hala´o serbisu ho di´ak.

“Ekipa tékniku komesa halo diskusaun, maibé montante orsamentu ba Tribunál sei hein pakote orsamentu ne´ebé governu sei mai hato´o,”  Deolindo hato´o ba jornalista sira iha Palásiu Prezidente Nicolau Lobato, Bairu-Pité, Dili, segunda ne´e, hafoin levanta kestaun ne´e ba Xefi Estadu Lú Olo.

Prezidete Repúblika liuhusi sorumutu ne´e fó apoiu ba Tribunál atu hadi´a nia kondisaun ne´ebé temi iha leten para bele hala´o serbisu ho di´ak iha futuru.

Iha biban ne´e, Deolindo mós hato´o ba Prezidente Repúblika katak avaliasaun ba juiz internasionál sira sei la´o hela liuhusi Konsellu Majistratura Judisiál. Nia iha esperansa boot katak iha tempu badak nia laran sei bele halo relatóriu finál ba prosesu balun.

Nune´e mós, nia hato´o ba Xefi Estadu katak oras ne´e Tribunál iha hela faze feriadu judisiál ne´ebé sei termina iha 15 Setembru no serbisu Tribunál nian sei hahú hikas iha 18 Setembru tinan ne´e.

Kona-ba kazu pendenti, nia hatán, Prezidente Tribunál Rekursu hanesan juiz ida no juiz sira seluk labele fó komentáriu antisipada ba kazu sira ne´ebé oras ne´e pendenti hela iha Tribunál.

(Jornalista: Xisto Freitas)

(Editór : Manuel Pinto)

HUSIK IDA HATÁN