Prioridade MAP : Hamenus Inseguransa Alimentár Hasa’e Seguransa Alimentár

0
100
Ministru Estadu no Ministru Agrikultura no Peska, Estanislau Aleixo da Silva

DILI (TATOLI)- Ministru Estadu no Ministru Agrikultura no Peska, Estanislau Aleixo da Silva informa,  objetivu Ministériu Agrikultura nian mak, diversifika produsaun ai-han iha ita-nia rai-laran para ita bele iha kbiit hamenus inseguransa alimentár hodi hasa’e seguransa alimentár.

“Bainhira aumenta produsaun, la’ós produsaun ai-han mas diversifika produsaun ai-han iha ita-nia rai-laran para ita bele iha kbiit hamenus inseguransa alimentár hodi hasa’e seguransa alimentár, tantu ida ne’e mak objetivu topu nian,” Estanislau da Silva hatete iha Palásiu Nobre Lahane, ohin.

Iha area sira hanesan peska, agrikultura, floresta no pekuária veterinária diresaun Jerál ida-idak iha Ministériu Agrikultura no Peska (MAP) tuur hamutuk ona hodi haree no aprezenta pontu ba programa Governu nian no definisaun prioridade kada setór nian, atu oinsá mak servisu di’ak liután para fó apoiu ba agrikultór sira hodi aumenta produsaun ai-han iha rai-laran.

“Ami agora oinsá mak atu aumenta tan produsaun ikan Tilapia tanba ikan di’ak tebes ba alimentasaun hanesan proteína, kualidade alimentasaun ne’ebé ita-nia povu bele iha asesu ho presu baratu no hetan iha fatin hotu-hotu,” Estanislau haktuir

Aleinde ne’e oinsá mak atu halo melloramentu ba Karau, intensifika produsaun Batar, sistema irrigasaun ne’ebé iha no aumenta asesu ba populasaun ikan tanba iha Timor-Leste ema ida iha tinan ida prátikamente han ikan kilo 5-6 de’it , nune’e ki’ik demais tanba ne’e hakarak aumenta.

Prioridade seluk mós mak hadi’a kualidade servisu no kapasita tékniku sira para bele fó asisténsia no kapasitasaun di’ak ba agrikultór sira.

“Buat ida importante mak oinsá muda sistema produsaun bainhira ita prodúz, ita iha merkadu, ema produtór sira bele sente buat ne’ebé prodúz iha asesu ba merkadu. Ita hakarak muda sistema produsaun ida ne’ebé familiár de’it, sufisiénsia, produsaun ida ne’ebé iha orientasaun husi merkadu”.

Estanislau relata iha tinan kotuk udan-been la mai, halai-natar fatin balun produsaun laiha no konsege kuda de’it ektare mil 10 no agora ne’e atu masimiza utilizasaun sistema irrigasaun ne’ebé iha hodi aumenta produsaun haree, aleinde ne’e haree mós ba batar, fore-keli no fore-mungu.

(Jornalista : Maria Auxiliadora)

(Editór : Manuel Pinto)

HUSIK IDA HATÁN