Primeiru Ministru Austrália no BM Kongratula Marí Alkatiri

0
123
Primeiru Ministru Austrália, Malcolm Bligh Turnbull (karuk) no Vise Prezidente Banku Mundiál (BM) ba Ázia Orientál no rejiaun Pasífiku, Victoria Kwakwa (kuana). Foto espesiál

DILI, (TATOLI) – Governu Austrália liuhosi ninia Primeiru Ministru, Malcolm Bligh Turnbull no Vise Prezidente Banku Mundiál (BM) ba Ázia Orientál no rejiaun Pasífiku, Victoria Kwakwa hato’o mensajen felisitasaun ba Primeiru Ministru, Marí Alkatiri.

Turnbull hato’o parabéns liuhusi kontaktu telefone, foin lalais ne’e. Xefe Governu, Alkatiri liu hosi oportunidade ne’e informa ba Turnbull katak, Governu Konstitusional da-hituk fó konfiansa tomak ba Xefe Negosiadór ba Fronteira Marítima, Kay Rala Xanana Gusmão hodi lidera negosiasaun tomak ba Tasi Timor to’o nia finalidade.

Tuir komunikadu ne’ebé asesu, Primeiru Ministru realsa, nia iha konfiansa relasaun entre Timor-Leste ho Austrália sei buras liu tan iha futuru.

Nasaun viziñu ne’e mós kontinua ho kompromisu apoiu Timor-Leste hodi atinje diversifikasaun ekonómika.

Entretantu, tuir karta Victoria Kwakwa, Banku Mundiál nia kompromisu atu apoia Governu Konstitusionál da-hituk hodi bele alkansa objetivu dezenvolvimentu ekonómiku país nian, nune’e mós hein katak oportunidade ida ne’e bele hatene di’ak liutan vizaun no prioridade ba dezenvolvimentu hodi hametin liu tan parseria ho Timor-Leste.

Jornalista: Agapito dos Santos

Editora: Rita Almeida

HUSIK IDA HATÁN