Prezidente Lú Olo Haksolok ho Partisipasaun Feto iha PN

0
97
Prezidente Repúblika, Francisco Guterres Lú Olo bainhira loke sesaun lejislatura da-haat Parlamentu Nasionál, ohin. Foto António Goncalves

DILI, (TATOLI) – Prezidente Repúblika, Francisco Guterres Lú Olo haksolok ho partisipasaun feto iha Parlamentu Nasionál (PN) tuir quota ne’ebé determina ona.

“Ho laran haksolok tebes maka ha’u haree partisipasaun feto sira-nian iha uma fukun ida ne’e tuir kuota ne’ebé determina tuir lei partidu polítiku, lei ne’e loke dalan atu ita hotu haree beibeik ita-nia feton sira nu’udar ema iha direitu hanesan ho mane sira”, hato’o Lú Olo liuhusi nia deskursu bainhira loke lejizlatura da-haat Parlamentu Nasionál, sesta (15/9).

Nia orgullu boot bainhira haree inan feton na’in tolu túr iha meza parlamentu no la’ós foin agora maka kargu sira ne’e fó ba maluk feto sira, maibé iha mandatu sira uluk, kargu sekretária nian no mós vise prezidente nian,  konfia ona ba maluk feto sira.

“Ita nia espíritu nakloke dadaun ona ba justisa sosiál, ha’u fiar katak iha tinan lima tuir mai, ita-nia feton sira ne’ebé túr dadaun iha uma fukun ida ne’e, sei hasa’e ba beibeik sira-nia kapasidade atu taru malu mós ho mane maluk sira”, Lú Olo haklaken.

Nia hatutan, inan feton na’in ida bele mós manán fiar, liuhusi votu sekretu no livre, atu kaer kargu prezidente parlamentu ba mandatu 2022 to’o 2027 no nia husik hela dezafiu ida ne’e ohin, iha sesaun solene ida ne’e, ho esperansa katak ida ne’e sei akontese duni, nu’udar hahalok ida atu haburas justisa sosiál iha rai doben Timor. 

Jornalista: Xisto Freitas

Editora: Rita Almeida

HUSIK IDA HATÁN