Prezidente Board RTTL.EP Propoin Edifísiu Andar Tolu

0
206
Logo RTTL.EP

DILI, (TATOLI) – Prezidente Board Radio Televizaun Timor-Leste Emprensa Públika (RTTL.EP), Milena Abrantes entrega ona relátoriu no dezeñu kona-ba edifísiu provizóriu Rttl E.P ho andar tolu ba governu da-hituk liuhosi Ministru Prezidensia Konsellu Ministru atu toma konsiderasaun.

“Ita iha ona dezeñu, espera katak ohin hateten ona katak governu foun sei bele konsidera no implementa, liliu edifísiu provizóriu andar tolu ne’ebé atu konstrui iha Kaikoli tanba durante ne’e Ajénsia Dezenvolvimentu Nasionál ( ADN) mós mai haree ona kondisaun estúdiu tuan”, Milena ba jornalista sira hafoin hetan vizita hosi Ministru Adriano do Nascimento ba RTTL, Kaikoli, ohin loraik.

Nia hatete, estúdiu tuan labele halo rehabilitasaun maibé tenke sobu hodi halo konstrusaun foun, biar nune’e governu sei harii uluk edifísiu provizóriu atu bele asegura ekipamentu no funsionamentu tarefa diária tenke la’o hafoin bele halo konstrusaun edifísiu permanente ba Rttl E.P.

Entretantu, Ministru Prezidensia Konsellu Ministru hatete instituisaun ne’e importante atu promove no konsolida imajen Estadu no governu, tanba ne’e governu tenke hatan infraestrutura nune’e bele produz informasaun ne’ebé di’ak ba komunidade.

Ministru Prezidensia Konsellu Ministru, Adriano do Nascimento.

“Sétimu governu iha programa no wainhira iha nesesidade instituisaun Estadu no nesesidade povu nian hakarak eh lakohi tenke konsidera nafatin atu nune’e bele kontribui ba dezenvolvimentu mídia iha Timor-Leste”, dehan Adriano do Nascimento hafoin hala’o vizita ba Rttl E.P.

Vizita ne’e atu haree besik nesesidade saida de’it mak presiza, haree kondisaun infraestrutura no servisu, nune’e bele sai hanesan rekomendasaun atu diskute iha nivél polítika.

Nia afirma informasaun pertinente tanba atu forma pensamentu sidadaun sira nian oinsá mak atu hatene loloos lalaok Estadu nian atu sira bele partisipa ativu iha prosesu dezenvolvimentu nasionál.

Eis deputadu ne’e rekoñese governu da-neen liuhosi Sekretariu Estadu Komunikasaun Sosiál halo ona buat barak maibé governu da-hituk mai atu haree buat ne’ebé ladauk kontinua halo, buat ne’ebé seidauk tenke buka atu hatur nia fatin, sistema ne’ebé iha ona sei kontinua nafatin, ida ne’ebé presiza tenke hadia no buat ne’ebé ladauk instala tenke halo, nune’e Rttl E.P bele la’o ba oin.

Jornalista: Zezito Silva

Editora: Rita Almeida

HUSIK IDA HATÁN