Presiza Hametin Defeza Soberania

0
173
Ministru Defeza no Seguransa, Agustinho Sequeira “Somotxho”. Imajen Mídia Palásiu PR.

DILI (TATOLI)—Ministru Defeza no Seguransa, Agustinho Sequeira “Somotxho” hateten Timor-Leste presiza hametin defeza soberania nune´e nasaun viziñu sira labele halimar ho Timor nia soberania.

Antes ne´e, peskadór sira hosi nasaun sira seluk tama to´o iha área Timor-Leste sein husu autorizasaun hodi nauk rikusoin liu-liu ikan no balada sira seluk iha tasi laran. Hanesan veteranu, Somotxho informa, nia lakohi nasaun viziñu sira halimar Timor nia soberania.

“Ohin loron imi haree ró hira maka iha ita nia tasi laran, presiza tuir regras no presiza respeita ita nia soberania. Presiza informa ba Estadu ida ne´e kuandu sira tama iha ita nia rain. Buat sira ne´e hotu maka hanesan defeza no seguransa ne´e todan. Ema halimar ho ita tanba ita laiha defeza ba ita nia soberania. Ida ne´e maka preokupasaun boot ba ha´u,” nia ko´alia asuntu ne´e ba jornalista sira iha Palásiu Prezidente Nicolau Lobato, Bairu-Pité, Dili, kuarta ne´e, hafoin komprimenta Xefe Estadu Lú Olo.

Kona-ba enkontru ho Prezidente Repúblika, Somotxho informa, nia seidauk bele hato´o ninia programa ministériu ninian tanba foin simu tomada pose nune´e presiza tempu oituan hodi prepara programa ukun ninian.

 “Enkontru ida ne´e nu´udar kompañeiru ba luta tanba dezde Lú Olo eleitu nu´udar Prezidente Repúblika, ami hotu hamutuk maibé nunka komprimenta. Ohin mós ha´u sai hanesan Ministru Defeza no Seguransa entaun nu´udar komandante sumpremu, ha´u mai komprimenta nia (Xefe Estadu),” nia dehan.

Segundu pontu, Somotxho informa, hanesan Ministru Defeza no Seguransa, responsabilidade ne´ebé tula ba ninia leten nu´udar Ministru Defeza no Seguransa, órgaun ida ne´e (Palásiu Prezidente Nicolau Lobato) presiza seguransa di´ak atu dignifika órgaun Estadu refere.

Nia promete katak nia sei autoriza hodi aumenta seguransa iha Palásiu Prezidente Repúblika no Palásiu Governu. “Nu´udar Ministru Seguransa no Defeza, buat balun ne´ebé maka ha´u tenke impoin tanba ha´u nia responsabilidade atu garante seguransa ba órgaun soberania hotu-hotu,” Somotxho haklaken. (Jornalista: Xisto Freitas)

HUSIK IDA HATÁN