Presiza Halo Mapeamentu ba Agrikultura

0
139
Peskizadór no dosente UNTL, Lúcio Marçal Gomes. Foto/Egas Cristovão.

DILI, (TATOLI) – Peskizadór no dosente Universidade Nasionál Timor Lorosa’e (UNTL), Fakuldade Agrikultura, Lúcio Marçal Gomes hatete agrikultór sira iha Timor-Leste lahanesan ho rai seluk tanba hala’o serbisu iha forma setór agrikultura nian hotu, nune’e presiza halo mapeamentu agrikultura nian.

“Nia halo tiha ortikultura mas ida ne’e nia lafoku halo fali kafé, haki’ak fali animál, halai natar. Ita hakarak atu tranforma mentalidade ne’e iha setór ortikultura, ezemplu ita haree Maubise, Aileu, Ermera, Hatubuiliku, Ainaru, Same, no parte leste nia Baukau, ita tenke eduka ita-nia agrikultór sira ne’e tau prioridade ba saida”, dehan Lúcio iha Kampus Sentrál UNTL, ohin.

Lúcio fó ezemplu iha Autoridade Munisípiu Baukau katak iha poténsia ba tomate, Governu investe osan hodi tau subsídiu ruma atu prodús tomate. Ermera, Maubise no Aileu prodús de’it mak modo para labele hadau malu.

“Kuandu kada munisípiu ida-idak prodús ona entaun nia merkadu mós iha ona, ne’e mak bolu buka ne’e mós iha no ida atu sosa iha, nune’e agrikultór sira iha ona boa vontade no espíritu atu serbisu. Agora, ita ko’alia kona-ba merkadu, agrikultór sira halo maibé como nian merkadu laiha di’ak liu halo para ba han de’it”.

Nia hatutan daudaun ne’e agrikultór sira-nia orientasaun ba komérsiu seidauk iha maibé halo depois fa’an uitoan de’it. Bainhira atu eduka agrikultór sira atu sai komersiante entaun tranforma sira-nia mentalidade ne’e atu halo ektare 10 ka 20 hodi dezenvolve ortikultura.

“Fó asisténsia ne’e labele tanba projetu, bainhira projetu hotu ne’e laiha ona, ne’e ita eduka ema ida ne’ebé ladún loloos. Tuir loloos trasforma ema ne’e tenke ho mentalidade iha nia kontinuidade”.

Henesan sientífiku ida husu ba Governu atu halo mapeamentu agrikultura nian ne’ebé klaru katak Governu tenke aloka ona ba munisípiu hitu ne’ebé iha poténsia ba produsaun kafé hodi konsentra bá munisípiu hitu hodi prodús de’it mak kafé.

Munisípiu Baukau, Lautein no Vikeke prodús mak nú no tenke dezenvolve mak ida ne’e nomós iha karau, fahi, bibi no tenke dezelvolve ida ne’e mós para husi munisípiu hitu iha rai-klaran presiza bá fatin sira ne’e hodi sosa.

“Sira munisípiu tolu ne’e ho Manatutu presiza kafé bá sosa iha munisípiu hitu ne’ebé prodús kafé. Natar iha Vikeke, Natarbora, Same Suai, Maliana, lalika halo buat barak, tau buat ne’ebé benefit, sira ne’e prodús foos, irrigasaun tama Manatutu, treinu agrikultór sira, tau tratór konsentra iha fatin ida, tenke bolu ema espesialista iha klimátika tuur hamutuk ho agrikultór no universidade sira halo planu di’ak hodi determina tempu ne’ebé di’ak hodi kuda hare, bainhira mak kuda batar, haki’ak animál no bainhira mak kafé atu fuan, tenke tuur ho ema klimátika rai ninian”.

Tanba ne’e Governu tenke iha ona mapeamentu ne’ebé di’ak para koordena ho universidade no governu lokál para halo planu konkretu ida hodi bele implementa, nune’e iha futuru sei di’ak no hamutuk ho Governu hodi dudu setór agrikultura ne’e sai hanesan baze ekonomia nian.

Jornalista: Maria Auxiliadora

Editora: Rita Almeida

HUSIK IDA HATÁN