PR Lú Olo Nomea Alkatiri Ba PM VII Governu

0
195
Prezidente Repúblika, Francisco Guterres bainhira sorumutu ho líder istóriku nu'udar Sekretáriu Jerál Partidu FRETILIN, Marí Alkatiri iha Palásiu Prezidénsia Repúblika, kuarta horsehik. Imajen Mídia Palásiu PR.

DILI (TATOLI) – Prezidente Repúblika (PR) Demokrátika Timor-Leste (RDTL), Francisco Guterres Lú-Olo ofisiálmente anunsia hodi nomea Sekretáriu Jerál Fretilín Mari Alkatiri ne’ebé indijitadu hosi Fretilín nu’udar partidu mais votadu iha eleisaun foin lalais ne’e hodi sai Primeiru Ministru ba VII Governu Konstitusionál. Nomeasaun ne’e halo, ohin, Kinta (14/09) iha Palásiu Prezidensiál.

“Loron horisehik, tuku 12:00 resin, koligasaun entre partidu Fretilín ho Partidu Demokrátiku (PD) mai aprezenta kandidatura kargu Primeiru Ministru ba VII Governu Konstitusionál, hafoin ha’u rona tiha, ha’u tenke eleje kompeténsia liuhosi konstituisaun atu nomea Xefe Governu, Dr. Mari Alkatiri ne’ebé indijitadu hosi Fretilín,” Xefe Estadu, Lu-Olo haktuir liuhosi Konferénsia Imprensa iha Prezidénsia Repúblika, Bairru-Pité, ohin.

Razaun PR nomea Mari Alkatiri bazeia ba  kompeténsia Prezidente Repúblika tuir Konstituisaun RDTL artigu 106 no artigu 85 iha alínea d), inklui garante hosi polítika partidu mais votadu Fretilín ho partidu PD ne’ebé iha sira nia karta ba PR Lú Olo mensiona katak, mezmu koligasaun governu minoritáriu, maibé sira nafatin loke ba partidu sira atu asegura estabilidade governativa.

Nune’e PR Lú Olo legaliza nomeasaun ne’e  liuhosi dekretu Prezidénsia Repúblika nian.

“Iha posibilidade nafatin atu partidu polítiku sira hotu sei bele kontinua halo diálogu nafatin iha tempu oin mai hodi bele garante pás no estabilidade liuliu atu garante estabilidade governativa iha períodu tinan lima,” Lú Olo fó hanoin.

Nu’udar xefe estadu, Lú Olo husu ba povu Timor-Leste atu bele hakmatek nafatin tanba lakleur de’it Nia sei fó pose ba VII Governu Konstitusionál.

Fó hanoin hikas de’it katak, Artigu 85. (Kompeténsia rasik) Prezidente-Repúblika de’it mak sei hala’o knaar hirak ne’e:  d) Foti no fó pose ba Primeiru Ministru ne’ebé partidu eh aliansa partidu sira ho maioria parlamentár sei foti, bainhira rona partidu polítiku sira-ne’ebé iha Parlamentu Nasionál.

Artigu 106. (Nomeasaun) 1. Primeiru-Ministru hili hosi partidu ida ne’ebé iha votu barakliu ka hosi aliansa partidu

sira-ne’ebé iha nia ema barak iha Parlamentu no iha nomeasaun hosi Prezidente-Repúblika, bainhira rona tiha partidu polítiku sira ne’ebé iha reprezentante sira iha Parlamentu Nasionál.  2. Membru Governu sira seluk, Prezidente-Repúblika mak sei hili liu husi Xefe-Ministru nia proposta.

(Jornalista : Zezito Silva).

(Editór : Manuel Pinto)

 

 

 

HUSIK IDA HATÁN