Povu Hetok Iha Maturidade Maibé La Nega Istória

0
224
Bispu Dioseze Baucau, Don Basilio do Nascimento ba Ajénsia Notisioza Tatoli iha nia rezidénsia Baucau kona-ba ezistensia partidu politiku sira. Foto Tatoli/Zezito Silva

DILI (TATOLI)—Bispu Dioseze Baukau, Dom Basílio do Nascimento observa katak, konstelasaun polítika ohin loron (2017) nian muda povu nia mentalidade hodi maduru liu iha polítika, kompara ho tinan 2007 to’o mai 2012. 

“Ha’u hanoin katak, iha tinan 2007 mai to’o 2012 ne’e bele dehan katak, situasaun perigu uitoan. Tinan 2012 sa’e mai to’o 2017 hatudu mai ita katak, povu ne’e matenek no povu ne’e aprende lais, ne’e duni, ema eroi sira ne’e sei konta nafatin, ema la haluha e nunka bele nega ema sira ne’e Nia intervensaun  iha istória Timor nian,” Dom Basílio do Nascimento ba Ajénsia TATOLI bainhira hasoru malu iha Supermerkadu Pâtéo, Kuarta (13/09) lokraik

Maibé tuir Dom Basílio figura hanesan lider sira Kay Rala Xanana Gusmão, Mari Alkatiri, Taur Matan Ruak inklui veteranu sira seluk, povu konta nafatin sira nia figura, maibé iha tinan sanulu resin lima nia laran povu Timor aprende buat barak ona tanba ne’e, povu nunka nega sira nia intervensaun iha ita nia istória, maibé ita la bele mós hanoin de’it buat pasadu nian hodi haluha hateke ba futuru.

Importante liu ba moris ohin loron nian mak, presiza tebes lider ida ne’ebé aprenjenta programa ne’ebé di’ak e liu-liu kompeténsia téknika, hatene define prioridade e haree buat ne’ebé di’ak liu ba bein star povu nian.

“Ha’u hanoin ohin loron kritériu sira ne’e mak ema atu tetu. Ne’ebé  ha’u hanoin biar governu minoritáriu, maibé sei iha programa di’ak hodi bele halo di’ak ba povu nia vida, ha’u hanoin katak, biar governu minoritáriu populasaun sei hatene apresia buat saida mak di’ak no buat saida mak ladún di’ak,” Bispu Dom Basílio haktuir.

Nia reforsa, ohin loron naran konta nafatin maibé tenke rekoñese katak naran ladún todan ona, nune’e ita hotu hein, tanba povu matenek ba daudaun ona.

Biar sira la nega ema nia naran, ema nia intervensaun, maibé hosi sorin seluk ita mós la moris ona iha tempu uluk, tempu agora ne’e kontestu oin seluk, ne’e duni la depende de’it ona ba naran sira boot ne’e, maibé depende liu ba kapasidade atu governa no kapasidade lideransa.

(Reportajen : Manuel Pinto)

HUSIK IDA HATÁN