Posibilidade Membru CNRT Tama Governu Ho Indepéndente

0
1394
Membru deputadu sira hosi bankada CNRT halo juramentu iha uma fukun Parlamentu Nasionál, ohin. Foto Tatoli/António Goncalves

DILI, (TATOLI) – Prezidente Konsellu Diretiva Nasionál partidu Kongresu Nasionál Rekonstrusaun Timorense (CNRT-sigla portugés), Dionísio Babo Soares hateten pozisaun partidu CNRT mak opozisaun nafatin maibé ba futuru mak membru ida ou rua tama iha governu konsidera sira indepéndente.

“CNRT nia pozisaun sai opozisaun nafatin maibé iha futuru mak membru ida ou rua tama iha VII Governu Konstitusionál konsidera ba hanesan indepéndente”, dehan Babo ba ajénsia Tatoli iha Parlamentu Nasionál, tersa (5/9).

Tuir nia, kuandu ba hotu governu sei la kontribui ba dezenvolvimentu nasionál liu-liu iha check and balance tanba ne’e ba ho opozisaun konstrutivu atu sai filtru eh koa buat di’ak ba interese povu nian hodi bele ajuda dezenvolvimentu ba oin.

Partidu CNRT apoiu nafatin no respeita nafatin governu koligasaun atu asegura estabilidade governativa, signifika bele ezekuta planu estatéjiku dezenvolvimentu nasionál iha 2011 to’o 2030, bele iha mudansa no ajustamentu maibé tenke la’o tuir nafatin liña ne’ebé iha.

Pozisaun paritidu CNRT iha opozisaun atu kontrola prosesu dezenvolvimentu nasionál ne’ebé VII Governu Konstitusional ezekuta to’o tinan lima.

Enkuantu, partidu CNRT deside atu fó apoiu nafatin ba governu koligasaun maibé kuandu akontese buat ida disputa tenke la’o tuir konstituisaun.

Antes ne’e, Eis-Prezidente, José Ramós Horta informa partidu Frente Revolusionariu Timor-Leste Indepéndente (FRETILIN) sei kontinua halo diálogu ho Prezidente CNRT, Kay Rala Xanan Gusmão no Prezidente Partidu Libertasaun Populár, Taur Matan Ruak atu servisu hamutuk maske iha koligasaun hosi Partidu Demokrátiku (PD) ho Kmanek Haburas Unidade Nasionál Timor Oan (KHUNTO).

FRETILIN sei kontinua halo diálogu ho partidu CNRT no PLP atu kolabora malu mezmu iha ona koligasaun maibé la signifika tama atu halo koligasaun no balun hanesan inkluzaun eh hakarak kolabora malu.

Kompara uluk iha tinan tolu nia laran, FRETILIN la tama koaligasaun maibé kolabora maka’as ho CNRT, prosesu la’o di’ak iha momentu ne’eba, FRETILIN la ezije tantu la iha dokumentu ruma entre FRETILIN ho CNRT maibé Xanana presiza bankada FRETILIN apoiu orsamentu no Xanana mós fó konfiansa ba Mari Alkatiri hodi ka’er projetu ZEEMS nian.

Jornalista: Zezito Silva

Editora: Rita Almeida

HUSIK IDA HATÁN