PN Suspende Projetu Deliberasaun Kriasaun Komisaun Eventuál

0
121
Atividade Parlamentu Nasionál. Foto dokumentasaun relasaun públika PN

DILI, (TATOLI) – Parlamentu Nasionál (PN) liuhosi Prezidente Meza, Aniceto Guterres suspende projetu deliberasaun kriasaun komisaun eventuál ba revizaun rejimentu PN ninian tanba proponente sira husi bankada retira projetu ne’e.

Projetu ne’e tuir ajenda atu halo diskusaun no votasaun horseik, maibé tanba iha diferénsia idéias iha plenária, prezidente meza haruka atu ajenda ba ohin loron hodi iha diskusaun entre bankada parlamentár sira tanba projetu ne’e sub-eskreve husi reprejentante bankada parlamentár sira hotu iha uma fukun.

Plenária horseik, Aniceto esplika iha nesesidade atu halo revizaun ba rejimentu PN atu adapta ho realidade foun no nesesidade ne’ebé hakarak halo iha lejislatura da-haat tanba ne’e revizaun ne’e buat ida importante.

Nune’e diskusaun plenária ohin, sei koordena ho téknika sira hodi prepara esbosu ruma ba alterasaun no apela ba bankada parlamentár bele halo diálogu nafatin oinsá atu hakat ba oin iha inísiu lejislatura.

Prezidente bankada  Kongresu Nasionál Rekonstrusaun Timor (CNRT-sigla portugés), Arão Noe haktuir, horseik ninian bankada reuniaun hodi foti konkluzaun katak alterasaun rejimentu ne’e importante mas seidauk prioridade.

“Prioridade agora mak programa governu, orsamentu retifikativu no Orsamentu Jerál Estadu (OJE). Nune’e di’ak liu suspende lai alterasaun, nune’e tékniku sira kumpri enkuantu seidauk iha atividade no asesór sira bele prepara draf ba alterasaun rejimentu, estatutu deputadu no lei sira hafoin ita aprova OJE 2018 mak ita bele tama funsionamentu normál mak bele halo alterasaun hodi ajusta ho rejimentu. Tanba ne’e mak bankada CNRT retira sub-eskreve ba projetu lei ne’e para hein draf. Ami deklara retira proponente ba proposta deliberaun ne’e”, tenik.

Entretantu, xefe bankada Frente Revolusionariu Timor-Leste Indepéndente (FRETILIN), Francisco Branco hatete, alterasaun rejimentu atu fasilita funsionamentu parlamentu.

“Ita asina ona dokumentu ida hafoin retira fali, alterasaun ba rejimentu laiha motivu polítiku ida, motivu atu fasilita funsionamentu parlamentu ne’e, liu-liu iha sansaun ba deputadu sira, ita laiha baze legál atu halo prosesu ne’e”, katak Branco.

Nune’e, Prezidente PN, Aniceto Guterres hatete, la vale buat ida sei halo votasaun, manan ka lakon la vale buat ida PN, sei la para tanba rejimentu vigor hela, apenas revizaun atu adapta ho realidade foun maibé sei maioria iha ne’e lakohi halo revizaun klaru laiha ona revizaun mas PN sei la’o nafatin.

Jornalista: Julia Chatarina

Editora: Rita Almeida

HUSIK IDA HATÁN