iklan

INTERNASIONÁL

PN Aprova Votu Solidaridade Ba Mexico

PN Aprova Votu Solidaridade Ba Mexico

Deputadu sira votu solidaridade ho unaminidade ba akontesimentu dezastre naturais iha Mexico. Foto Julia Chatarina

DILI, (TATOLI) – Parlamentu Nasionál (PN), ohin, liuhosi plenáriu aprova votu solidaridade ho unaminidade ba akontesimentu dezastre naturais iha Mexico foin lais ne’e, ne’ebé rezulta ema nain 320 mate ho possibilidade númeru vítima sei aumenta.

Mezmu iha diferénsia oituan iha diskusaun plenáriu konaba númeru vítima husi trajedia ne’e, rezultadu husi votu ne’e a favor 59, kontra 0 no abstensaun 0.

Maria Lay husi bankada Kongresu Nasionál Rekonstrusaun Timor (CNRT-sigla portugés) hateten vítima balun seidauk hetan tanba ne’e difísil determina númeru konkretu no enkuantu prosesu buka vítima sira sei la’o nafatin maibé rainakdoko sei kontinua. Ne’e duni tuir nia, labele tau númeru sertu ba vítima.

Nune’e mós husi bankada Klibur Haburas Unidade Nasionál Timor Oan (KHUNTO) Luis Roberto hateten, presiza dadus konkreta husi Mexico, tanba ne’e husu PN atu halo justitifikasaun konkreta hafoin foti desizaun atu bele ajuda.

Iha fatin hanesan David Ximenes husi bankada Frente Revolusionariu Timor-Leste Indepéndente (FRETILIN) hateten problema agora la’ós númeru mas fó sentimentu solidaridade.

Entretantu, iha loron tersa kalan (19/9), rainakdoko ho forsa 8,4 escala richter akontese iha Mexico ho númeru vítima ne’ebé a’as no tuir autoridade númeru ne’e sei aumenta.

Antes ne’e, desastre naturais hanesan akontese iha Mexico iha loron 19 setembru 1985 iha tuku 07:19 dader ho forsa 8,1 escala richter no rezulta ema nain 10.000 mate ho destruisaun grave.

Jornalista: Julia Chatarina

Editora: Rita Almeida

iklan
iklan

Leave a Reply

iklan
error: Content is protected !!