PN Aprova Projetu Deliberasaun Konstituisaun KP

0
96
Votasaun Projeitu Deliberasaun Konstituisaun Komisaun Permanente iha Plenaria, Tersa (12/9). Foto Tatoli/Julia Chatarina

DILI (TATOLI) – Plenaria IV Lejizlatura, ohin, Tersa (12/09) aprova ho unanimidade projetu deliberasaun konstituisaun Komisaun Permanente ho objetivu atu garante funsionamentu normal Parlamentu bainhira tama iha tempu resesu.

Mezmu iha deferénsia idea iha plenária no diskusaun naruk konaba númeru total membru Komisaun permanente, maibé ikus mai votasaun projetu ne’e pasa ho rezultadu afavór 60, kontra 0, no abstensaun 0.

Tuir ajenda votasaun ba projetu ne’e loloos realiza horisehik maibé tanba sei iha diskusaun iha nivel bankada, votasaun iha plenária adia ba ohin, Tersa (12/9).

Iha projetu deliberasaun ne’e haktuir, komisaun permanente Kompostu husi  Prezidente Parlamentu Nasionál (PN), vise prezidente Nain rua no úniku deputadu ne’ebé indikadu husi partidu polítiku (ParPol) ho akordu no respetiva reprezentativa iha PN.

Númeru total membru Komisaun permanente  mai husi Parpol fiksa ona iha kada lejizlatura, nune’e obriga entrega reprezentante husi bankada parlamentár. kompostu husi total 27 deputadu inklui  Prezidente PN, vise prezidente Nain rua no 24 deputadus ne’ebé indikadu husi parpol.

Nune’e deputadus iha Komisaun permanente ne’ebé distribui husi parpol FRETILIN 9 deputadus, CNRT 9 deputadus, PLP 3 deputadus, PD 2 deputadus, no KHUNTO 1 deputadu.

Prezidente PN, Aniceto Guterres esplika komisaun permanente nia funsaun mak garantia funsionamentu Parlamentu Nasionál bainhira tanba iha tempu resesu.

“Bainhira  tama resesu karik atu interompe funsionamentu normal ho tempu naruk mak presiza komisaun permanente,” Aniceto esplika.

Entretantu Deputadu Adéritu Hugo husi bankada CNRT observa katak projetu ne’e la nesesáriu tanba tuir artigu 102 konstituisaun nia hateten buat rua ba kriasaun komisaun permanente ne’e , bainhira  iha situasaun Parlamentu dezolvidu ka iha sesaun resesu nia laran maibé tinan ida ne’e ita laiha resesu.

Fidelis Magalhães, nu’udar prezidente bankada Partidu Libertasaun Popular hato’o preokupasaun konaba númeru komisaun permanente, tanba tuir nia sedu liu atu ita deside númeru. Hafoin nia sujere atu bele redús númeru deputadu husi bankada ne’ebé fiksa kedan iha meza para iha proporsionálidade.

Nune’e mós deputadu Fransisco Branco husi bankada FRETILIN hateten komisaun permanente ne’e importante atu kompleta komisaun sira.

(Jornalista: Julia Chatarina)

(Editór : Manuel Pinto)

 

HUSIK IDA HATÁN