PM Informa Funsionamentu Governu Jestaun ba PR

0
88
Primeiru Ministru, Rui Maria de Araújo bainhira hasoru malu ho Prezidente Repúblika, Francisco Guterres Lú Olo iha Palásiu Prezidensiál Nicolau Lobato Bairo Pite, ohin. Foto mídia PR

DILI, (TATOLI) – Primeiru Ministru, Rui Maria de Araújo, ohin informa funsionamentu governu jestaun ba Prezidente Repúblika, Francisco Guterres Lú Olo iha Palásiu Prezidensiál, Bairo-Pite.

“Ha’u mai hasoru Xefe Estadu hodi informa governu jestaun ne’ebé la’o hela no enkontru ne’ebé ami halo ho dirijente administrasaun públika kona-ba kestaun governu jestaun ne’ebé la’o hela nafatin”, informa Xefe Governu ba jornalista sira hafoin hasoru malu ho Xefe Estadu.

Além ba ne’e mós informa kona-ba kestaun seguransa nian ne’ebé buat hotu la’o di’ak. Polísia Nasionál Timor-Leste (PNTL) no FALINTIL-Forsa Defeza Timor-Leste (F-FDTL) hala’o sira nia servisu hanesan bai-bain no akompaña nafatin kalendáriu polítiku agora la’o hela.

Tuir nia, VII Governu Konstitusional iha ona prosesu atu avansa ba oin no iha ona data balun ba simu pose no prezidente sei hein konfirmasaun partidu koligasaun atu foti desizaun.

Kona-ba posibilidade pose governu nian, nia hatan, aban eh se la’e semana oin tanba Xefe Estadu konfirma mak loos ona bele fó ona pose, se seidauk bele ba semana oin tan, maibé husu ba VI Governu atu nafatin mantein servisu to’o governu foun simu pose.

Enkuantu, PM Rui agradese Xanana Gusmão hanesan lidér istóriku ne’ebé konfia nia atu lori kruz governu nian hosi 2015 to’o 2017.

Hakarak agradesé mós Mari Alkatiri ne’ebé hakarak simu kruz hosi hodi lori ba oin.

“Sé karik haree ba linguajen via-sakra nian, ha’u hanesan Simão hodi ajuda lori kruz ne’e to’o agora no sente kontente tanba kruz ne’e bele transfere ba Xefe Governu foun hodi lori kruz governasaun ne’e ba oin”, tenik nia.

Jornalista: Zezito Silva

Editora: Rita Almeida

HUSIK IDA HATÁN