PM Husu KAK Kontinua Promove Governasaun Di’ak

0
43
Komisáriu Komisaun Anti Korupsaun, Aderito Tilman (karuk) ho ninia adjuntu, Rui Pereira hasai retratu hamutuk ho Xefe Governu, Rui Maria de Araújo (klaran) hafoin hasoru malu iha Palásiu Governu, ohin. Foto GPM

DILI, (TATOLI) – Primeiru Ministru, Rui Maria de Araújo husu Komisaun Anti Korupsaun (KAK) hodi servisu di’ak liutan ho Ministériu Públiku no Tribunál ba prevensaun korupsaun hodi promove governasaun di’ak.

Adjuntu Komisáriu KAK, Rui Pereira dos Santos  hato’o pedidu xefe governu ne’e hafoin halo despedida iha Palásiu Governu, ohin.

“Primeiru Ministru husu promove boa governasaun liliu instituisaun hanesan KAK, Ministériu Públiku no Tribunál atu servisu hamutuk ba dezenvolvimentu Timor-Leste di’ak liutan, prevene mal administrasaun, krime  no korupsaunʺ, hatutan nia ba jornalista sira.

Nia informa, KAK hetan apoiu orsamentu rihun atus rua resin hodi selu kompañia hosi Portugal hodi kria dezeñu ba edifísiu foun KAK ho andar haat ne’ebé kompleta ho ekipamentu servisu.

Hatutan, dezeñu ne’e tama ona iha faze finál tanba ne’e  tuir planu iha tinan oin sei hahú konstrusaun iha área Farol Dili.

“Dezeñu ne’e tama ona faze finál tanba faze tolu hotu ona no hela faze ikus ne’ebé ita sei selu tan kompañia ne’e provolta rihun neen nuluʺ, tenik.

Nia dehan, Xefe Governu mós agradese ba KAK ne’ebé apoiu ona governu hodi promove boa governasaun ho esperansa governu foun kontinua fó ninia tulun, liliu haree ba lei anti korupsaun no seluk tan.

Lei anti korupsaun kaduka iha mandatu lejislatura da-toluk.

Jornalista: Agapito dos Santos

Editora: Rita Almeida

HUSIK IDA HATÁN