PD Prontu Servi, Assanami Deskonfia Ema Seluk Uza PD

0
1552
Dadalia entre jornalista ho Prezidente PD, Mariano Assanami Sabino iha CCF, ohin dader.

DILI (TATOLI)—Prezidente Partidu Demokrátiku (PD), Mariano Assanami Sabino hateten nia la aseita bainhira ema ruma hosi PD ka ema seluk lori PD nia naran lobby kadeira (pasta governasaun) hosi kotu-kotuk.

Assanami realsa PD mantein kaer palavra orden: “Ba o Timor, ami prontu atu serbí”. Ne´e katak PD la ezije kadeira ka fatin.

“Ami la ezije ka la husu pasta. Ami iha de´it kompromisu katak ami kontinua fó apoiu ba governasaun ida ne´ebé durante ne´e timoroan kaer hahú hosi 2002 kedas. Prosesu konstrusaun Estadu maski iha situasaun difisil maibé ita hakarak kontinuidade nafatin,” nia hato´o kestaun ne´e ba jornalista sira iha sede Comité Central da FRETILIN, Fatuhada, Comoro, Dili, segunda ne´e, hafoin reuniaun entre partidu FRETILIN, PD no KHUNTO kona-ba koligasaun.

Mariano informa PD laiha objesaun ba koligasaun no garante katak iha tempu badak bele asina ona akordu koligasaun. Ba PD, nia tenik, importante maka hala´o nafatin Planu Estratéjiku  Dezenvolvimentu Nasionál (PEDN) ne´ebé iha ona maibé presiza hadi´a ou atualiza liu-tan.

Nia hateten, nia konkorda ho ema hotu-hotu ne´ebé serbisu iha governasaun inklui membru governu tenki ho méritu para bele eduka timoroan sira serbisu tuir área espesializada atu atinje serbisu efisiénsia no efikás no mós eleva timoroan moris iha atmosfera demokrátiku.

Iha fatin hanesan, Portavóz Partidu Kmanek Haburas Unidade Timor Oan (KHUNTO), José Turquel hateten enkontru ne´e kapa ´as tebe-tebes tanba Sekretáriu Jerál Partidu FRETILIN, Dr. Marí Alkatiri hatudu duni grandeza hanesan lider ida hodi loke espasu ba konversas.

“Partidu menus votadu maka KHUNTO. Maibé iha prosesu ida ne´e, KHUNTO nia lian ohin maun boot sira rona,” nia dehan.

Ba KHUNTO, nia tenik, Timor-Leste ne´e nasaun ida postu konflitu, tanba ne´e KHUNTO la ezije pasta maibé importante maka konsentrasaun ideas no konsentrasaun vizaun ba Timor ida di´ak liu.

“Imajina to´ok, ohin ita hamnasa hela maibé depois sai ba liur ita haree ema hirus malu no tuda malu, ne´e ladún di´ak. Tanba ne´e, ami hanesan menus votadu, tenke buka jeitu katak sé hamnasa karik ita hotu hamnasa,” Turquel informa.

(Jornalista: Xisto Freitas)

(Editór : Manuel Pinto)

 

HUSIK IDA HATÁN